آذربایجان ائل بیلیمی درنگی نین کندلرده ن آرشدیرما چرشنبه دبلرینین راپورو


آذربایجان ائل بیلیمی درنگی نین کندلرده ن آرشدیرما چرشنبه دبلرینین راپورو

آخير چرشنبه و نوروز بايرامي گونلرينده، جوانلار بوياق، ساري چوپ، سوغان قابيغي و باشقا رنگلرله بويانميش يومورتالاري دؤيوشدوررلر. يومورتا اويناماغين اوز قايدا قانونو واردير:

توپلایان: مریم خدابخش

قئیده آلینما یئری و تاریخی:

گونئی ماحالی ، صوفیان باغ وزیر کندی ، 12/11/1387

قایناق شخصلر: نرگس خدابخش(37 یاشیندا،

نهصت ده اوخوموش، باغ وزیرده دوغولموش)

نازنین سلمان پور (71 یاشیندا،ساواد سیز،

باغ وزیرده دوغولموش)

حسین خدابخش(55 یاشیندا

ساوادی بئش کیلاس باغ وزیرده دوغولموش)

-خبر چرشنبه (xəbər çərşənbə):

بایرام (اسفند) آیی‌نین ایلک چرشنبه‌سینه وئریلن آددیر. دئییلنلره گؤره بو چرشنبه‌ده آغ یئل اسر، بئله‌لیکله‌ده یئره نفس گلیب، آییلار، بوزلار اریییب، آغاجلار اویانار. بوتون بونلار ایسه بایرامین گلدیگیندن خبر وئریرلر.

بو هفته بویو کند اهلی جولا قازیب، تینگ اکرلر، یئر سوروب، یاز اکینینه باشلارلار. اونلار مرجی، نوخود، یاز آرپاسی، کوروشنه، یونجا، شنبلله اکر؛ خانیملار ایسه بایرام ایشی اولاراق یومالیلارینی یویوب، ائولرینی سلقه-سهمان ائلرلر.

2-گوله چرشنبه (gülə çərşənbə):

بایرام آیی‌نین ایکینجی چرشنبه‌سینه وئریلن آددیر. بو چرشنبه‌ده خانیملار گؤی گؤیردرلر. اونلار مرجی، کوروشنه، بوغدا، آرپا، یا دا زه‌،ره‌ک (zə’rəh)ایسلادیب بالاجا ساخسی کوزه‌لره چکیب گؤیردرلر. بو هفته بویو کند اهلی ساری تیکان، چالقی (چالی) تیکان، و اودون ییغیب آخیر چرشنبه‌یه حاضیرلیق گؤررلر.

3-کوله چرشنبه (külə çərşənbə):

بایرام آیی‌نین اوچونجو چرشنبه‌سینه وئریلن آددیر. بو چرشنبه‌ده باغ‌وزیرین اهلی دیرناقلارینی توتوب، ساچلارینی ووردوروب، هابئله مال-داوارین قویروقلارینی وورارلار.

4-آخیر چرشنبه (axir çərşənbə)

بایرام آیی‌نین سون چرشنبه‌سینه وئریلن آددیر. آخیر شنبه‌ده یئرینه یئتیریلن دبلر چوخ اطرافلی اولوب، آشاغاداکیلاردان عیبارت اولوردو:

الف) نیشانلی قیزلارا چرشنبه‌لیک آپارما

بو دب تزه گلینلری اولان عاییله‌لره عاییددیر. چرشنبه آخشامی اوغلان ائوی بایرام اوچون آلدیغی تؤحفه‌لری (کیف، باشماق، قیزیل، چادیرا، دون، و…) میوه، شیرنی، چرشنبه یئمیشی، دیری تویوق، بیر بوشقاب پیشیریلمه‌میش دویو، گؤی، آینا و بالیق ایله بیرلیکده قابلارا یا دا میسدن، آلومینیومدان اولان مژمئییلره دوزوب بزه‌ییر و باشقا اقرابالار طرفیندن بزه‌نن مژمئییلرله برابر باشلارینا آلیب قاوال چالا-چالا قیز ائوینه آپارارلار. قیز ائوینده انعام آلمایینجا تاباقلارین هامیسینی یئره قویمازلار. تاباقلار یئره دوزولندن سونرا اوستلرینه نوغولدان، شوکولاتدان سپیب، چالیب اوینایاندان سونرا گئدرلر. خونچالاری گؤرمگه قیزین قونشولاری و اقرابالاری دا اورادا حاضیر اولار.

ب)سودان آتیلما

آخیر چرشنبه سحر تئزدن دوروب تمیز آخار سو یا دا چشمه‌لردن آتیلماغا گئدرلر. اوغلان، قیزلار آتیلارکن دئیرلر:

آتیل-باتیل چرشنبه، بختیم آچیل چرشنبه

آروادلار ایله کیشیلر ده دئیرلر:

آغیرلیغیم، اوغورلوغوم، ناخوشلوغوم تؤکولسون بوردا قالسین

سونرا او چشمه‌دن بیر قاب سو دولدوروب ائوه آپاریب، اوجاق اوسته قازان آسیب، گتیردیکلری سویو قاینادار (ایناندیقلارینا گؤره او سو یئره قویولمامالیدیر) و اونلا یویونارلار، چونکو دئییرلر چرشنبه سویو اینسانین بدنینی یونگول و ساغلام ائلر.

ج)آچار سالما

آخیر چرشنبه آخشامی بعضیلر نیت ائله‌ییب بیر آچار (کلید) یا سانجاق آیاقلارینین آلتیندا، قونشولارینین قاپیسیندا دوروب او ائوده گئدن سؤزلره قولاق آسارلار و ائوده ائشیدن سؤز-دانیشیقلاری اؤز نیّتلرینین فالی توتارلار. بعضیلر ده ایگنه تاخیب بئله اینانارلار کی هر نه ائشیتسه‌لر او باشلارینا گله‌جکدیر. بونا گؤره ده باغ‌وزیرین اهلی بو گونده ساواشماز و بئله اولدوقدا گلن ایلین سونونا کیمی ناراحاتلیق چکه‌جکلرینه اینانارلار. اونلار آخیر چرشنبه خوش سؤزلر دانیشیب و آچارین دوز چیخدیغینی سؤیلرلر.

د)قیزلارا پای گؤندرمه

باغ‌وزیرده آخیر چرشنبه‌نین آخشامی شام دویو، خوروشو ایسه قره‌گؤز لوبییه اولار. بو آخشام آنالار قیزلارینا پای گؤندررلر. اونلار پیشیردیکلری شام یئمگیندن بیر بوشقاب چکیب، چادیرا، کؤینک، جوراب، چرشنبه یئمیشی، و… ایله بیرگه قیزین خیردا باجی یا قارداشی واسیطه‌سیله قیزلاری ائوینه گؤند‌ررلر. باجیلاری ایسه اونلاری بیر جوت جوراب ایله یولا سالار.

ه) اود یاندیرما

آخیر چرشنبه آخشامی کند اهلی داملاردا اود یاندیریب اوستوندن آتیلار. قیز، اوغلان آتیلارکن دئیه‌ر: آتیل-باتیل چرشنبه، بختیم آچیل چرشنبه؛ آرواد، کیشیلر ایسه دئیه‌ر: آغیرلیغیم، اوغورلوغوم، نوخوشلوغوم توکولسون بوردا قالسین. البته بیرینین یاخینلاریندان تزه اؤلن اولوب و بیرینجی ایلی اولسا، اؤلو صاحیبی‌نین احترامینا کند اهلی اود یاندیرمازلار.

و) شال (قورشاق) ساللاما

کندین جاوانلاری آخیر چرشنبه آخشامی ائولرین باجاسیندان (قدیم ائولرده کورسو قورولدوغونا گؤره پنجره یئرینه باجا اولاردی) شال ساللایاردیلار. ائو صاحیبی ساللانان شالین اوجونا ایگده، کیشمیش، جویز (گیرده‌کان)، بویانمیش یومورتا، ایپ جوراب و کورسو اوستونده اولان باشقا شئیلردن باغلایاردی. بعضی ائو صاحیبلری شوخلوق اوچون دئیردیلر:

“اوغلان قیزیم چوخدو، ایسته‌سن بیرن باغلیییم شالیوا” و گولردیلر. بئله‌لیکله او گئجه خوشلوق ایله سحر اولاردی.

دئمه‌لی جاوانلار سئودیکلری یا نظرلری اولان قیزین، یا نیشانلی اوغلانلار قایناتانین و عمومیتله یاشلیلارین ائولرینه شال ساللایاردیلار.

سؤزلری گئدن دبلردن باشقا بیر سیرا اویونلار آخیر چرشنبه‌لرین آیریلماز بؤلوملری ساییلاردی. بو کندین اوشاقلاری و جاوانلاری خوش اولماق اوچون خبر چرشنبه‌دن ایل تحویل اولونجا یومورتا دؤیوشدوررلر. هابئله اونلار آخیر چرشنبه گونو پالچیقدان فیشقا یا دا ماشین دوزلدیب بایرامدا اوینادارمیشلار. باشقا اویونلاریندان بیر کیلوقراملیق یاغ قابی ایچینه کارپئت ایله سو بعضی زامانلار ایسه زرنیخ تؤکوب پارتلادارمیشلار.

خداآفرین بولگه‏سینده

ایل بایرامی

توپلایانلار: محمد علیپور، علی برازنده

قئیده آلینما یئری و تاریخی:

خدا آفرین بولگه سی 1387 دئی آیی

قایناق شخصلر: ایسماعیل لیثی له خانیمیسی، گل آرا جمالی(ماهریزلی کندی)، توتو خانیم احمد پور(ماهریزلی کندی)، فیروزه حاتمی(ساریجالی کندی)، علی فرضی زاده(جعفر آباد کندی)، ستارکول محمدی، علی قهرمانی(شوجئیلی)

آرازچايي‌نين اوستونده خدا آفرين بؤلگه‌سينده خداآفرين سدّينين دوزلمه‌سيله آرازين ساغ قيراغيندا دؤرد كندين دئمك؛ سوجايلي (شجاعلو)، ساريجالي (علي آباد)، ماهريزلي (مفروضلو)، جعفرآباد، سو آلتينا گئتمه‌سيله بو دؤرد كنده ياشايانلاري اولدوقلاري يئردن بير آز آرالي جانانلي شهرجيگينده بير يئره ييغماغا باشلاييبلار. 1387-جي ايلين دئي آييندا كندلیلرله بير دانيشيغيميز اولدو اونلارين دبلرينی، گله‌نكلرينی سوروشوب يازديق. بو يازيلارين بير بؤلومو بايراملا ايلين سون چرشنبه‌سينه گؤره‌دير.

كندليلرين ديديگينه ایلین سون آیی، 3 چرشنبه‌سي وار: خبرچي (يالانچي) چرشنبه، كوله چرشنبه ، آخير چرشنبه. آخير چرشنبه‌ده آغاجلار آييلار، سولار تزه‌له‌نر، يئر آييلار، سؤيود آغاجلاري اييليب يئره باغير باسارلار ( تعظيم ائدرلر )، نوروز گولو چيخار. آخير چرشنبه آخشامي هر كس اؤز قاپيسيندا تونقال قالايار (كند اهلي‌نين دئديگینه گؤره قديملر بيري ائوده اولماسايدي كنديلر ييغيشيب قاباقجا اونون قاپيسيندا تونقال قالارديلار). تونقال قالاناندان سونرا ” آغيرليغيم _ اوغورلوغوم تؤكول قال بوردا ” دئيه اودون اوستوندن آتيلارلار. بوگونده، نئچه دب وار كي هره اؤزونه گؤره اونو یئرینه یئتیرر. بونلار بئله‌دير:

پيلاو پيشيرمك

بو گئجه بوتون عاییله اهلی بير يئره ييغيلار، خئييرلي سؤز دانيشارلار. بوتون ائولرده پيلاو پيشر. قديمكي يوخسوللوغا گؤره بير پارا ائولرده تكجه بو آخشام اوشاقلار پيلاو يئيه بيلردي.

باجادان سو تؤكمك

قوهوم قونشو ظارافات اوچون پيلاو پيشن اوجاغا دامين باجاسيندان سو تؤكرلر كي سؤنسون.

شال ساللاماق

جاوانلار ساللاماق اوچون قورشاق، شال، يايليق يادا چاديرا گؤتوروب ائولرين بيرينين باجاسيندان ساللارلار. ائو ييیه‌سي شالا بويالي يومورتادان، پولدان، يئميشدن باغلار. بعضا ده بيري ائوين قيزينا مشتري دورار ائوين باجاسيندان شالي ساللار، ائوين آناسي گلر كي شالا بير پاي باغلاسين:

_ بالا يومورتا باغلاديم

_ ايسته‌ميرم

_ پول باغلاديم

_ ايسته‌ميرم

_ ياخشي قيزي باغلاديم چك آپار.

انجير آغاجينی بورماق

هر كس بير نيّت ائديب انجير آغاجينين بوداغينی بورار. اؤرنك اوچون بيري نيت ائدر كي من زيارته گئده‌جم، سحر تئزدن گئديب باخار اگر بوروق بوداغ دوزه‌لسه سئوينر كي نيّتي قبول اولوب گئدر سفره حاضيرلاشار يوخسا بوداغين بوروغو دوزلمه‌ييبسه اونداديركي نيّت قبول اولماييب.

ائوين بار _ باجاسينا داش ييغما

مال داوارين چؤلدن گلن واختي ائوين بار_ باجاسينين قيراغينا هره بير داش قويار سحر تئزدن گئديب باخارلار هر كسين داشينين آلتينا قورد _ قوش ييغيشسا اوندا سئوينر كي وارلي دئولتلي اولاجاق. بيرينين ده داشينين آلتي بوش اولسا او کئفسیزلشر کی من كاسيب اولاجاغام.

سؤيود آغاجيندان ايستك

سؤيود آغاجينی قوجاقلاييب آللاهدان بير شئي ایسترلر.

قولاق بيسماق ( قولاق آسما)

بير كس اورگينده بير سؤز توتوب، اؤرنك اوچون نيّت ائدر كي گؤر‌ن فيلان خانيمين اوشاغي اولاجاق يوخسا يوخ. گئديب ائوين بيرينده دانيشيقلارينا قولاق وئرر اگر ايلك ائشيتديگي سؤز اوشاغا گؤره اولسا سئوينر كي نيتّي قبول اولوب.

سو قيراغينا يومورتا دوزمك

گئجه هره بير چيي يومورتا گؤتوروب آخار سويون قيراغينا گئدرلر. يومورتالاري ديك_ديكينه سويون قراغيلا باسديرارلار يانلارينا دا زي، كؤمور، قيرميزي جوهر قويارلار. اوباشدان گئديب باخارلار بيرينين يومورتاسينا گؤررسن كي قيرميزي لكه، بيرينين‌كينه آغ لكه، بيرينين‌كينه ده قارا لكه دوشوب. آغ لكه كيمين‌كينه دوشسه بختي آغ اولار، قيرميزي اولاسا قيرميزي گونه چيخار، هر كسين ده يومورتاسينا قارا لكه دوشسه او کئفسیزلشر کی باختي قارا اولاجاق.

اود یاندیرماق

آخير چرشنبه تونقال قالانيب چئورسينده شنليك ائدندن سونرا ائولره چكيلرلر. ائولرده يار_ يولداش، تاي_ توش بير يئر‌ده دئييب، گولوب، اوينايارلار. قاباقجالار آشيق گتيررميشلر.

سودان آتیلما

اوباشدان كند اهلي دوروب، يومورتا قويان يومورتاسينا باش چكر، انجير بوران انجيرينه. جار_ جاوانلار دا آخار سويا ساري يؤنه‌لرلر؛ آخي بوگون سو تزه‌له‌نيب چايلاردا آخان سو دنيزلرده دالغالانان سو تزه سودو. قيزلار سويون اوستوندن آتيلب، ” آغيرليغيم اوغورلوغوم تؤكول قال بوردا” آتيل باتيل چرشينبه باخيم آچيل چرشبنه” دئيه سويون اوستوندن آتيلارلار. ( قاباقجالار آراز چايي‌نين يانيندا اولدوقلارينا گؤره چوخلاري گئديب آرازدان كئچرديلر). اوغلانلار سويون اوستوندن آتيلاندان سونرا دوشوب سودا چيمرلر. قادينلار گؤي گؤیره‌نتي دريب سويا وئررلر. بولاقلارين تزه سويوندا يويونارلار. گلنده ده اؤزلريله تزه سو، بولاغين دا خيردا داشيندان گتيررلر. داشلاردان نهره‌يه سالارلار كي بركتلي اولسون سويو دا ائوين دؤرد بوجاغينا سپرلر كي تزه سودان ائوه خئير بركت دوْلسون. سونرا ائوين قاباغيندا تونقال قالايارلار. ائوي قوروملايارلار.

ائو قوروملاماق

ايل باشينا كيمي اوجاق يانان ائوده اودون هيسيندن ائوين ديره‌كلرينده، بور_بوجاغيندا قوروم باغلانار خانيملار سوپورگه‌نين دسته‌سينه آغاج باغلاييب، ائوين قوروملارين تميزلرلر. ائوي تميزله‌يندن سونرا بوغدا قاويريب، ائوين دؤرد بوجاغينا سپرلر كي ائو بركتلي اولسون.

گؤروشلر

كيشي‌لر چرشنبه گونو داغدا، باييردا گزيشرلر. قيزلاردا آغاجلارا كوف باغلاييب اوينايارلار. بئله‌ليكله بايرام اؤزو چاتار. ايل دييشيلر يئني ايل باشلانار. هامي تزه پالتار گئيينيب، ائوينده بؤيوك بير سوفره آچيب اوستونه مئيوه، شيرني ييغار. كندين كيشيلري كندين مئيدانينا ييغيشيب اگر او ايلي كندده قارا بايراملي اولسا ياني ياسلي عايیله اولسا اونلارا گئديب بير فاتحه وئررلر. اولماسا كندين آغ‌ساققالارينين ائويندن باشلاييب بير_بير ائولره گئديب، قاپيدان گيريب “بايرام – چرشنبه‌ز موبارك اولسون، نئچه _ نئچه بئله بايراملار گؤره‌سيز ” دئيه اوتوروب مئيوه‌دن، شيرنيدن يئييب دورارلار. بير_بير ائولري گزيب قورتارارلار. كيشيلردن سونرا خانيملار دسته_ دسته گئديب ائولرده بايرامي تبريكلرلر. خانيملار هره‌سي اللرينده بير نعلب‌‌كي‌نين ايچينه ايكي شيرني قويوب ائولره گئدرلر هانسي ائوه گئتسه‌لر شيرنيلري او ائوده قويوب يئرينه آيري شيرني او ائودن گؤتوررلر بئله‌ليكله ائودن ، ائوه شيرني آپارارلار.

بايرام ایله گلن ايونلار.

بَي _ گیزير اوْيونو:

جار_جاوان بير يئره ييغيشيب اؤز آرالاريندان بير بي سئچرلر. بَيين قاباغينا بير آت كلله‌سي سومويونو بير ده قاميش قويارلار ، بَي ده اؤزونه بير گيزير سئچر، نئچه نفرده مامور وئررلر ، بَي بويروق وئرمگه باشلار. بيرين توتوب گتيررلر بَيين يانينا. بَي، گؤيلوندن كئچني اوندان ايستر؛ يا دئير بير تويوق يا جوجه وئر! يا دا گيزيره دئير آپار اونا بير ايكي يوموروق يا تپيك وير، بوراخ.

يومورتا دؤيوشدورمك:

هر كس بير نئچه بويالي يومورتا گؤتوروب بير يئره ييغيشارلار.

_ هه، كيم منن يومورتا دؤيوشدورور؟

بيري آلار يومورتاني ديشينه وورار سسيندن بيلر هانسي‌سینين يومورتاسي بركدي، هانسي‌سينينكي بوشدو. گؤرسه اؤزونونكو اونونكوندان بركدي دئيير:

– من

_ گتير ووراخ

_ سن توتورسان من ووروم يوخسا من توتوم سن وور

_ توت ووروم

يومورتاني بيري توتار او بيرسي اوج طرفدن بير_ بيرينه وورار هانسيسي‌نين يومورتاسي سينسا او بيريسي اوندان يومورتاني آلار.

¬

بايرام گونلري، باشدان اوپپولما، كلله قورداشي، يومورتا باسديرماق، المنده كيمي اويونلارلا سووولار سيزدك گلر. يئمك گؤتوروب او گونو چؤلده كئچيررلر. بئله‌ليكله هامي آرزيلارينی ساخلار گلن بايراما.

هریس ده آخیر چرشنبه و ائل بایرامی

توپلایان: اسماعیل ممدلی

قئیده آلینما یئری و تاریخی:

هریس، 1387 ، شهریور آیی
گونده رن: آذربایجان ائل بیلیمی درنگی

بارات چاغيرماخ Barat çağırmax

اسفند آيي‌نين خبرچي، گول، گول و آخيرچرشنبه‌سي و بيرده بايرام آخشامي آداملار داملارا چيخيب، قاباقدان حاضیرلاديقلاري اودونلاري يانديريب، دوره‌سينه توپلاشيب اوستوندن آتيليب دئيرلر

“آغيرليغيم اوغورلوغوم سنين اولسون”

“آي بارات، پارتا پارت”

بير آز پارچاني دمير سيم‌له ساريييب اونو نفته بولايیب اود ووروب گؤيه آتارلار. بعضي‌لري آغاجدان توپانجا قاييريب، ايچينه باريت تؤكولموش ساخسي گوللـه‌لري اونون لوله‌سينه قويوب پارتلادارلار، بئله‌ليكله بير نئچه ساعات شنليك ائدرلر. سوندا دا شيطان ايچري گلمه‌سين دئيه دامين دوره‌سينی جيزيب حاصارلارلار.

قوُرشاخ ساللاماخ Qurşax sallamax

كؤهنه ايلين سونونجو گونو، آخشام گون باتاندان سونرا جوانلار اللرينه، اوجونا كيچيك بير كيسه باغلانميش ايپ يا بير شال گؤتوروب داملارا چيخيب، باجالاردان ائولرين ايچينه آسلارلار. ائو صاحيبي تانييار تانيماز، يومورتا، گيردَكان و باشقا بايرام اوچون آلينميش ميوه‌لردن شالين يا كيسه‌نين ايچينه قويار. دامداكي جوان او ائوين قيزينا آداخلي اوغلان اولسا اونون شالينا باهالي بير زاد او جومله‌دن ايپ جوراب باغلايارلار. باكيدا بو ايشه اوخشار مراسيمين آدي «پاپاق آتدي»دير.

سودان آتيلماخ Sudan atılmax

ايلين آخير چرشنبه‌سي سحر تئزدن آداملار چايين قيراغينا گئدرلر، سويون اوستوندن آتيليب دئيرلر:

آغيرليغيم اوغورلوغوم تؤكولسون.

كيشيلر آت چاپديرارلار، جوان گلينلر تئل‌لرينی كسيب دوز‌ن وئررلر، سويون ايچينده نئهره باغي توخورلار، نئهره‌نين ايچنه سالماغا اوچ عدد داش گؤتوررلر، چايدان سو گتيريب آيدينليق اوچون باجادان تؤكرلر يا او سو ايله غذا پيشررلر، كوچه‌دن يئددي عدد چوپ گؤتوروب، بدنظر دَ‌يمه‌سين دئيه نئهره‌نين آلتيندا يانديرارلار.

يومورتا اويناماخ Yumurta oynamax

آخير چرشنبه و نوروز بايرامي گونلرينده، جوانلار بوياق، ساري چوپ، سوغان قابيغي و باشقا رنگلرله بويانميش يومورتالاري دؤيوشدوررلر. يومورتا اويناماغين اوز قايدا قانونو واردير: هر كس اوز الينده‌كي و قارشي طرفين يوُمورتاسينی دادار (اوْنو ديشينه ووروب نه درجه‌ده برك اولدوغونو يوخلار)، سونرا قارشي طرفه دئير:

هانسي بركدير آل توت.

قارشي طرف برك بيلديگي يومورتاني گؤتوروب، اونو بير طرفي گؤرونن حالدا اووجوندا ساخلار، قارشي طرف دئير “ائيدير” (بير آز يان طرفين گؤستر)، بير نقطه‌يه توافق ائدندن سونرا، يومورتا صاحيبي وورولاجاق نقطه معين اولسون دئيه آغزينين سويوندان آزجا اورا وورار، قارشي طرف اؤز يومورتاسي ايله همان يئره وورار، كمين يومورتاسي سينسا اودوزوب، نتیجه‌ده يومورتاسينی او بيري طرفه وئرمه‌ليدير.

دين دينله‌مئك Din dinləmek

بايرام آخشامي، قاش قاراليب، هامي اؤز ائوينه گئدندن سونرا، خصوصيله جوان قيزلار يا گله‌جگيندن نياران اولان يا مخصوص بير موضوع حاقّيندا دوشونن آداملار ياواشجا قوْنشونون قاپيسي‌نين داليندا يا دامداكي باجانين يانينا گليب ائوده‌كيلرين دانيشديقلارينا قولاق ياتيرديب اونلارين دانيشديغي سؤزلردن، اؤز نظرينده توتدوغو مطلب اوچون نتيجه چيخاردارلار. اودور كي او گئجه ائولرده ياخشي سؤزلر دانيشماق گركدير.

گيردَكان اويناماخ Girdəkan oynamax

نوروز بايرامي گونلرينده جوانلار داملاردا، كوچه‌لرده، ياماج بير يئردن نوبه ايله بير گيردكان ديغيرلادار. گيردكانلار آشاغيدا چوخور بير يئرده داغينيق حالدا قرار توتارلار. نوبه‌سي گلنده هر اويونچو يئنه‌ده بير گيردكانين ديغيرلادار. اويونون دواميندا كيمين ديغيرلاتديغي گيردكان يئرده‌كيلرين بيرينه توخونسا اوردا توپلانميش گيردكانلارين هاميسي اونون اولار.

گؤروشه گئتمئك Görüşə getmek

نوْروز بايرامي‌نين بيرينجي گونو عايیله‌نين ياشلي آداملاري ياسلي ائولره گئديب باش ساغليغي وئررلر. سونرا جوانلار و اوْرتا ياش آداملار محلّه‌ده و طايفادا اوْلان ياشلي و حورمتلي آداملارين زيارتينه گئديب بايرامي تبريك دئييب اوزلري ايله كلّه قند يا ناردان، ناريش‌دان آپارارلار. ائو صاحيبي قوناقلاري شيريني‌جاتلا قارشيلاييب هر كسين اوز حالينا و باشينا گوره اونلارا بايرامليق وئرر. باشقا آداملار كوٍچه‌ده بير بيريني تبريك ائديب بئله‌جه بايراملاشارلار.

باغ وزیر کندینده چرشنبه لر

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: