اوغورلانمیش هدیه – بهروز ایمانی


اوغورلانمیش هدیه

بئله روايت ييرلركي، قديم زمانلاردا دؤرد نفر اكينجي مملكتين پادشاهي نين يانينا گئديرميش. اونلارين بيري حكمدار اوچون قيمتلي بير هديه آپاريرميش. اونا گؤره يول اوزونو كيسه‌سي‌نين آغزيني آچيب، هديه‌نين اولوب، اولماديغيني يوخلايير گؤروردوكي، شاها آپاريغي تحفه يئرينده دير. باشيني آشاغي ساليب آرخايين- آرخايين يولونو گئديردي. سن دئمه يول يولداشلاريندان بيري فرصت آختارييردي كي، اونو بير تهر اكسين، آنجاق فرصت اله دوشموردوكي، دوشموردو. نهايت گئجه اولدو. هامي ياتاندان سونرا يولداش كيشي‌نين عتيقه‌سيني اكيب قويدو جبينه. خوروزون بيرينجي بانيندا كيشي اوياندي باخيب گؤردو، له‌له كؤچوب يوردو قاليب. اولجه ايسته‌دي هاي ساليب، دئسين كي منيم عتيقه‌مي كيم اوغورلاييب وئرسين، يوخسا يا سيزه وئره‌ن ا… يا منه.
بير آز فكرلشيب، دئدي: ((يوخ، گئديريك پادشاهين يانينا اوردا شكايتمي دئيه‌رم، چونكي بو اوچ نفر مني بو ايتين قودوران يئرينده اؤلدوروب عتيقه‌ني ده آپارارلار.))
كيشي بؤ مسئله‌ني بير چوخ گؤتور- قوي ائده‌ندن سونرا تصميم توتدوكي، بو باره‌ده هئچ كسه بير سؤز دئمه سين. ائله ده اولدو. بير نئچه منزل گئدندن سونرا گليب چاتديلار پادشاه اولان يئره.
اجازه آليب، حكمدارين يانينا گئتديلر. هره اؤز درديني دئييندن سونرا پادشاه اونلاري مرخص ائتدي. اكينچي‌لر ايكي قات پادشاها تعظيم ائله‌ييب، بير- بير اوتلاقدان چيخديلار. عتيقه‌سيني اوغورلادان آدام بير آز آياق ساخلاييب، حكمدارا دئدي‌كي: ((قبله عالم ساغ اولسون گونلرين- بير گونو حيطي قازيرديم، بيرده- بيره قازماما قيمتلي بير شئي دييب، چيخدي ائشيگه. ائله همين يئرده فكرلشديم كي، اونو سيزين قوللوغوزا گتيرم، دئمه قسمت اولماياجاغميش. اونا گؤره كي، منيمله گلن دوستلاردان بيري نامردليك ائديب، سيزه گتيرديگيم عتيقه‌ني اوغورلاييب، مني سيزين يانيزدا خجالت ائله‌دي. حكمدار كيشي‌نين سؤزلريني ائشيدندن سونرا دستور وئردي او اوچ نفري تازه‌دن اونون يانينا گتيرسينلر. اونلار گلمه يينه گلدي. آمي پادشاه نه قدر اونلاري سيلكه‌لدي كي، گؤرسون اونا گتيريلن هديه‌ني كيم گؤتوروب، گؤردو يوخ هئچ كس بوينونا آلمير. حكمداردا او حكمدارلاردان دئييلدي كي، هر بير يونگول سؤز اوچون جوشوب- داشسين. اونا گوره قالان اوچ نفره دئدي كي، گئدين سحره كيمي ياخشي فكرلشين، بيرده اوغرو تاپيلماسا آنالاريزي آغلار قويوجاغام- دئيه، اونلاري مرخص ائتدي. اكينچي‌لر گئتمه يينه گئتدي. اما حكمدار يامان ناراحت ايدي. اونا گؤره ناراحت ايدي كي، بو مسئله‌ني عذاب- شكنجه‌ايله آيدينلاشديرماق ايسته ميردي. آنجاق اوندان ساوايي بير چاره‌سي قالماميشدي.
ايندي سيزه هاردان خبر وئره‌ك كيمدن دئيه‌ك، حكمدارين قيزيندان، قيز باخير گؤرور آتاسي ائله ناراحت ديركي، بو ساعت پيچاق ووراسان قاني چيخماز، اؤزوده عصباني حالدا اوتاقدا اويان- بويانا گئدير. قيز ايره‌لي گئديب، آتاسي‌نين بئله ناراحت اولدوغونون علتيني سوروشوب، بيلندن سونرا آتاسينا دئيير: سيز بو باره‌ده هئچ ناراحت اولمايين، چونكي من بو مسئله‌ني ائله حل ائده‌رم  كي، هئچ كيمسه يه ظلم اولماز. بو مسئله‌نين حلي پادشاه اوچون نه قدرچتين گؤرونسه‌ده قيزي‌نين آغيللي اولدوغونو چوخدان بيليردي اونا گؤره بير آز آرخايينلاشيب، ياتاغيندا اوزانيب، ياتدي… سحر آچيليب، آچيلماميش اكينچي‌لر شاهين حضورونا گتيريلدي، قيز اونلاري سؤزه توتوب دئدي:
اللهدان گيزلين دئييل سيزده‌نه گيزلين، بيزده سيز چوخ گزيب آرتيق تجربه قازانان آداملارا اوخشاريير سيز، اونا گؤره گلديم، گوروم منيم مسئله‌مي حل ائده بيلرسيز يا يوخ؟
اكينچي لرين دؤردوده دئديلر: سن سؤزونو دئي گؤره‌ك، نه اولور. قيز سوزه باشلادي:
دئيير بير نئچه ايل بوندان قاباق فلان مملكتين شاهي‌نين قيزي بير گون باغا گزمگه چيخير. گزديگي حالدا گوزو بير چيچگه دوشور. قيز ها چاليشيركي، گولو بير تهر درسين، دره‌بيلمير. سن دئمه باغانين اوغلو او طرفده باخير، گؤرور، بير گوزه‌ل قيزدير، اوزوده، سئچديگي گوزه‌ل بير چيچگي آغاجدان دره بيلمير. اوغلان ايره‌لي گئديب، گولو دريب، وئرير قيزا. قيز، اوغلاندان تشكر ائله‌ييب اونا دئييركي: سن منيم نه ايسته‌ييرسن؟ اوغلان دئيير، من سندن بير شئي آلماق تمناسيندا دگيلديم. ايندي كي اؤزون اصرار ائله‌ييرسن، من سندن اونو يانيما گله‌سن او پالتاردا سني بير دفعه گؤروم. قيز راضي اولوب، قصره قاييدير…
بير نئچه مدت كئچندن سونرا شاهين قيزيني وزيرين اوغلونا اره وئريرلر. توي گونو قيز آداخليسينا دئيير: ((من فلان باغبانين اوغلونا سؤز وئرميشم، بخت ائوينه گئتمه زدن اول گلين پالتاريندا، اونون يانينا گئديب، او مني بو پالتاردا گؤرندن سونرا، قاييديب، گلم، اجازه وئريرسيز؟ اوغلان اونون جوابيندا نه عيبي وار- دئيه، راضي اولور.
شاه قيزي اؤزونه مخصوص اولان گلين پالتاريني گئيب، باشدان- آياغا قيزيل- گوموش ايله بزه‌نندن سونرا، باغبانين اوغلو اولان مكانا ساري يولا دوشور…
شاه قيزي تله‌سيك گئدير. بير آز شهردن آرالانيب، آرالانماميش بير شير اونون قاباغيني كسيب دئيير: بني‌آدام بيزلره چوخ اذيت ائدير، ياخشي اليمه دوشوبسن، اونلارين عوضيني سندن چيخاجاغام. قيز شيره التماس ائله‌ييب دئيير: آي شير قارداش من باغبانين اوغلونا سؤز وئرميشم، توي پالتاريندا اونون يانينا گئده‌م. اجازه وئر قوي گئديم اونو گؤره‌ندن سونرا گلرم، مني اؤلدوره رسن.
شير دئيير: عيبي يوخدور گئت اؤز عهديني يئرينه يئتير قاييداندان سونرا حتما سني ديديب پارچالاياجاغام. قيز اوردان اوزاقلانيب، گئدير…
قيز بير- ايكي آدديم آتيب، آتماميش بير اوغرو يولونو كسيب، دئيير: هه نئچه گون دور اليمه هئچ نه دوشمور، ياخشي اولدو سن گلدين، تئز اول هر نه يين وار سويون وئرمنه يوخسا بو قلينجلا سني تيكه- تيكه دوغرارام. شاه قيزي اوغرونون بو ايشيندن چوخ ناراحت اولور اونا گؤره علاجسير قاليب شيره دئديگي سؤزو اونا دئييب، يالوارماغا باشلايير… اوغرودا راضي اولوب قيزا يول وئرير…
شاه قيزي باغا گيريب، اوغلانين يانينا گئدير. بو وقت اوغلاني يامان يوخو توتموشدو. قيز اونو بير تهر يوخودان اوياديب، دئيير: اگر فلان زمان يادنيزدا اولسا سيز بو باغدان منيم خوشوما گلن چيچگي دريب، منه وئرديگيزه گؤره سوز وئرميشديم كي، گلين پالتاريندا اول سيزين يانيزا گليب، سونرا ار ائوينه گئده‌م. ايندي بوگون اؤز عهديمه وفا ائتمك اوچون سيزين يانيزا گلديم. اوغلان شاه قيزينين عهد- پيمانا بو قدر صادق اولدوغونا مينلرجه آفرين دئييندن سونرا، قيزين بو عمليندن اوتانيب، دئيير: سيز مني چوخ باغيشلايين كي، بوش يئره سيزه زحمت وئرميشم. او وقتلر منيم ياشيم آزايدي، اوشاق‌ايديم، بيلمه‌ييب سيزينله بئله شرط باغلاميشديم خواهش ائدير. بويورون گئدين، اريز سيزي گؤزله‌يير، ساغ اولسون كي، صادق قيزسيز.
قيز قاييديب اوغرونون يانينا گلير و اونا دئييركي، ساغ اولون منه بو فرصتي وئرديزكي اؤز عهديمه صادق قالام. بو سيز بودا منيم وار- يوخوم، آپارين حلاليز اولسون. اوغرو قيزين بئله صداقتلي اولدوغونا گؤره اليندن هئچ نه‌ييي آلماييب، يولوندان چكيليب گئدير، قيز اوغرودان قورتاريب، شيرين يانينا گلير. شيرده اونون بو قدر ياخشي اولدوغونو گؤروب، يولوندان چكيلير…
اكينچي‌لر قيزين سؤيله ديگي بوناغيلا يامان قولاق آسير و گؤزله‌يير ديلركي، قيز ماجرانين داليسيني دئسين، ائله اكينچي‌لر بو فكرده اولاركن شاه قيزي اونلاردان سوروشوب دئدي: دئيين گؤروم قيزين آداخليسي ياخشي‌دير، باغبانين اوغلو، شير و يا اوغرو، هانسيسي؟
اكينچيلردن بيري وزيرين اوغلونو، بيري باغبانين اوغلونو، بيري شيري او بيريسي ده اوغرو دئديگي زمان. اوغورلانان عتيقه‌نين كيمده اولدوغو آيدينلاشدي…

یازان:  بهروز ايماني

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: