او دلی قیلینج + ناغیل


او دلی قیلینج

گونش دوغوردي. هاوا ايشيقلانديقجا، گردمان قالاسينين محتشم برجلاري آيدين گورونمه گه باشلاييردي. اوزاقلاردا گوموش بير كمر كيمي پاريلدايان كور چايي اوزانوب گئديردي، كورين اطرافي مئشه ليك ايدي، گوز ايشله ديكجه اوزانان دوزلر ياشيلليق ايچينده اوزوردي. بورادا قديم بابالاريميزين اليله يارانميش گوزه ل بير آذربايجان شهري يئرلشميشدي. هئچ بير ياندان سس سمير گلميردي، قوشلار بيله يوخودا ايدي. ايلك باخيشدا بو شهرده حيات علامتي گورونموردي.
ايله بيل وقتيله بوراني زينتله نديرن انسانلار چوخدان هارا ايسه كوچوب گئتميشدي. گردمان سارايينين قوجا كشيكچي سي عادتي اوزره يئنه ده گنيش حياطده گزينير، آرا- بير دايانوب اطرافي دينله ييردي. بيردن او ياواش- آيدين ائشيديلمه گه باشلايان باغيرتي و قيلينج سسلرينه ديكسينوب اطرافي دقتله دينله مه گه باشلادي، ايله بيل ايكي بويوك دسته نعره چكوب بير- بيريله اولوم- ديريم ويريشينا گيرميشدي، قوجا، شهره دشمن قوشوني دولوشديغيني ظن ائديب حكمدارينه خبر آپارماق ايسته دي، بو آندا ويريشانلار حياطده گورونديلر.
قوجا كئشيكچي قهقهه چكوب گولدي، قوشون حساب ائتديگي آداملار يالنيز ايكي نفر ايدي، اونلاردان بيري دال- دالي چكيلير، اوبيري ايسه ايلديريم كيمي قاباغينداكينين اوستينه شيغييردي.
اونلار قوجانين بوردا اولماسيندان خبر سيزديلر، اونين قهقهه سيني بئله ائشيتميرديلر چوخ قيزيشميشديلار پولاد قيلينجلار يئنيجه دوغان گونشين قيزيل شعاعلاريني عكس ائده رك پاريلداشيردي.
ويريشان گنجلرين اوزي گولدي.
ايره لييه دوغرو شيغييان دليقانلي گردمان حكمداري((واراز)) ين اوغلي ((جوانشير)) ايدي.
اونلار قيلينج دوگوشديريب مشق ائديرديلر. قوجا كئشيكچينين گولوشي بيردن كسيلدي ، بئله گئتسه ياخشي تانيديغي بو گنجلر بير- بيريني هلاك نايده بيلر ديلر.
جوانشير قاباغيندا كي اوغلانا محكم بير ضربه انديره رك، اونين قالخانيني يارييا بولدي:
– آت يئره قيلينجيني، اورموز!- دييه باغيردي:- ارنلر اوچه تن دئميشلر… بونينلا سن اوچ دفعه دير مغلوب اولوبسان…
قوجا كئشيكچي يالنيز ايندي گوروب اوتانان اورموز جوانشيرين غلبه سينه دوزمييوب اعتراض ائتدي:
– يوخ، بو اولمادي، آياغيم داشا توخوندي. سن هله يالنيز ايكي ضربه انديرميشسن… من قصدأ خاطرينه دگميره م.
جوانشيرين دوداقلاريندا كي تبسم ايزلري سيلينوب يوخ اولدو.
– بو بهانه دير، دوستوم،- دئدي.
اونلار يئنه ويريشماغا حاضيرلاشاركن، قوجا كئشيكچي جوانشيره ياناشدي:
– من دعوانيزي آيرد ائده رم- دئدي.
قيلينجلار يئنه پاريلدادي، اورموزين ضربه سي چوخ ناگهاني اولدي، جوانشير ايكي آدديم گئري چكيلدي پرت حالدا گوزلريني دوگدي:
– باخ، بونا سوزيم يوخدير، – دئدي. ويريشاركن اوزون دانيشماق منه چوخ بها اوتوردي.
قوجا كئشيكچينين ايشه قاريشماغينا احتياج قالمادي. جوانشير الينده كي قالخاني اوزونده ن كناره آتاراق اورموزين اوستينه جومدي.
– آل، بودا اوچ!- دييه سئوينجله باغيراراق اورموزا محكم ضربه ووردي- ايندي راضيسانمي؟
اورموز بو ضربه دن گوجله اوزيني دوغرولتدي قيلينجينين اوجوني يئره دايادي چيگنينين آغريسيني اونوتماق اوچون قوللاريني دورد- بئش دفعه هاوادا فيرلاتدي:
– چوخ گوزه ل- دئدي- من سنين مهارتيني اوره كدن تصديق ائديره م. بويوك حكمداريميز واراز دوغرودان دا خوشبختدير، اونين سويمه لي اوغلي جوانشير ايندي گردمانين ايگيد سركرده سي اولماغا دوغرودان دا لاييقدير… گل، گل اوزوندن اؤپوم!
قوجا كئشيكچي قيلينج مشقينين بئله قالماقالسيز قورتارماغينا سئوينيردي، اونين صدف كيمي آغ ديشلري پاريلدايير، ايري آلا گوزلري درين بير صميميتله آليشوب يانيردي. گردمان داغلارينين تميز هاواسيندا بويوموش بو قوجا يئتميش ايل ياشاميشسادا، هله قوجاليقدان شكايت ائتميردي، او جوانلارين بئله دوستجاسينا اوپوشديكلريني گوره ركن سئوينجدن ياشاران گوزلريني سيلدي و جوانشيره ياناشدي.
– اوغلوم- دئدي- دشمن بيرده اوستيميزه قيلينج قالديرسا، گردمان داغلارينين هئچ نه دن قورخوسي يوخدور، واراز قوجالوب گوجدن دوشسه ده جوانشير ساغ اولسون!
بيردن هاراداسا شيپور چاليندي، چوخ كئچمه ميش گردمان جنگاورلري بويوك ميداندا دنيز كيمي دالغالانوب تلاطمه گلدي.
وطنين آيدين سيماسي قارا بولوتلار اورتنده هميشه بئله اولاردي، شيپور سسلري هاميني چاغيراردي. گردمانين ايگيد سركرده سي ميداندا ديك بير يئرده گورونوردي. اونين بير سوزي ايله بو انسان دنيزي بير سمته دوغرو آخاردي. ائولرين دامينا چيخميش آلا گوزلي شمشاد بويلي قيزلار- گردمانين بو غنيرسيز گوزه للري- ماهني اوخويار و ووروشما ميدانينا يولا دوشنلره خير دوعا وئره رديلر. اونلارين ماهني سسيندن داغلار دره لر بئله وجده گله ردي.
اؤلوم سوزينين نه دئمه ك اولديغيني بيلمه ين گردمان ايگيدلري ووروشما ميدانيندا ييخيلوب حياطلا وداعلاشيركن ((ابديته قووشدوق)) دييرديلر.
ايندي ده شيپور چاليندي. ايندي ده گوزلر سركرده يه زيلله ندي، قوجا واراز اؤز ياخين آداملاري ايله برابر گلدي. گردمانين آناسي، وارازين اوزون و كشمكشلي حياتينين مهربان يولداشي جواهر خاتون دا گلدي.
انسان دنيزي سكوته غرق اولدو. واراز سوزه باشلادي. اونين سسينده غريب بير اومودسيزليك و يازيق بير تيتره ك واردي. هامي جبهه لر يارميش بو قوجامان سركرده نين سسيني ائشيدنده فلاكتين بويوك اولديغيني آنلادي.
واراز دئدي:
– عزيز اولاديم، بو قوجانين سوزلرينه دقتله قولاق آسين! مقدس گردمان اؤلكه سي بيزدن وفا ايسته يير. اودور، يئنه اوستوموزه دشمن گلير، چاپوب تالايان، ووروب ييخان، انصاف دييه نده، قيلينج چكه ن، ناموس دييه نده، اود ياغديران بير ياغي وار. اونين آدينا((وحشي خزر)) دئييرلر. اوستوموزه قان گلير، اؤلوم گلير. منده سيزه سون بورجيمي وئرمه گه گلديم، اوتوز ايلده هميشه اؤلوم بيزدن اوزاق اولدي، ناموسيميز تاپدانمادي، گردمان آدي گلنده، هامي اطاعتله باش اگدي. اما ايندي من قوجالميشام، بوگون سحر اوخ سوزدوروب قيلينج چالماق ايسته ديم، اللريم تيتره دي، سركرده نيز كيم اولاجاق! گوسترين!
آغ ساچلي، نوراني بير قوجا، حكمدارين اونينده احتراملا باش اگدي:
– اولو حكمدار!- دئدي،- اؤزون گوستر. اوتوز ايلده دوستيميزي دا، دشمنيميزي ده تانييان سنسن، كيم سركرده اولسا، ايگيدلريميز اونين بير سوزي ايله داغلاري يئريندن اويناداجاقلار.
واراز نوراني قوجانين اوزونه حرمت ائتديسه، سوزينه باخمادي. ائلين سسين دينله مك ايسته دي:
– كونولليلر ميدانا چيخسين،- دئدي.
بو آندا اورموزين قيلينجي پاريلدادي. او، وارازين قارشيسيندا اگيلدي، تعظيم ائتدي، قيلينجيني اويناتدي:
– بويوك حكمداريميز!- دئدي،- من آرتيق يئتگين بير جنگاورم، سركرده ليك قيلينجيني منه وئرين!
واراز اونون جسارتيندن راضي قالديسادا، فكرينه شريك اولمادي.
– ايگيد اوغلوم،- دئدي،- سن هله جوانسان. سركرده يه قيلينجي حكمدار وئرمه ز، ووروشما ميداني وئره ر.
اورموز بير داها دينمه دي، حكمدارين سوزلري اوني قانع ائتدي. سونرا جوانشير ميدانه چيخدي.
– منيم ده سوزيم واردير، آتا،- دئدي، دشمن سركرده سينين گوموش دسته كلي قيلينجيني آلاجاغيما سوز وئريره م.
واراز اوغلونون دا جسارتين بگه ندي، اما اوني داها چتين سيناقدان كئچيرمه ك ايسته دي.
– بلكه بيردن او سني مغلوب ائتدي؟
جوانشير سسيني اوجالتدي، بويوك بير غرورلا جواب وئردي:
– كور چايي دايانار، واراز اوغلو باسيلماز!- دئدي.
هامي جوانشيره افتخارلا باخدي، واراز ايسه، تجربه سيندن بيليردي كي، چوخ زمان قشنگ سوز دئمه گي باجاران آداملار، چتين حاللاردا قهرمانليق گوسترمكدن عاجز اولورلار. جوانشيره دقتله باخدي، سونرا دونوب جواهر خاتونين راييني بيلمه ك ايسته دي.
– اوغلون سركرده اولماق ادعاسيندادير، سن نه فكرده سن؟
جوانشيرين مهربان آناسي دينمه دي، واراز يئنه اوغلونا باخدي، اورموزا دئديگيني تكرار ائتدي:- هله جوانسان، اوغلوم ! دئدي.
جوانشير آتاسي ايله راضيلاشمادي. هامي ائشيتسين، دييه، سسيني داهادا اوجالتدي:
– اون دورد ياشلي بير حكمدار تانييرام كي، قانلي ووروشما ميدانيندا دشمن سركرده سينين باشيني بدنيندن آييردي.
واراز تجربه لي سركرده ايدي:
– قوشونين باشچيسي اؤلسه ده، محكم قوشون داغيلماز!- دئدي.
جوانشير چوخ سكوته دالدي، آتاسينين بو فكريني ده جوابسيز قويماق ايسته مه دي:
– من دشمن سركرده سيله قوشونيني داغيتديقدان سونرا قاباقلاشاجاغام، دئدي.
واراز ايسته كلي اوغلونون چوخ عقيللي بير گنج اولديغيني ياخشي بيليردي، لاكن اونين بو جوابلاريني ائشيتديكدن سونرا، جوانشيره محبتي داها دا آرتدي.
– ايله ايسه، تدبيريني سويله، اوغلوم،- دئدي.
– ووروشمانين سونيني گوزلرسن، آتا!- دييه جوانشير يئنه غرورلا جواب وئردي.
سونرا واراز اوزوني خلقه توتاراق سوروشدي:
– اولادلاريم! سيز نه دئييرسينيز؟
– راضييق، راضييق!- دئديلر.
ايله ايسه اوغورلار اولسون، بالا… اونوتما كي، گردمان تورپاغينين سرحدي كور چايينين اوتاييندان باشلانير.
– بوني بيليرم، آتا… قوي مهربان آنام منه خير دعا وئرسين.
بوتون خلقين گوزي گردمانين آناسي جواهر خاتوندا ايدي، اونون هر بير كلمه سيني ياخشي دينله مك اوچون هامي بوتون دقتيني اونا وئردي.
جواهر خاتون دئدي:
– ايندي ده منيم سوزلريمي دينله، اوغلوم، بير زمان، هله سن اوشاق ايكن دعواده، دشمنين پولاد قيلينجي مني سينه مدن يارالادي، من آغلاديم، اوغلوم! ((جوانشيريم ساغ اولسون)) دئديم، ائوه قاييتديم. سنين سينه ني تازه آل قانيملا بوياديم. من دواسيز- درمانسيز ساغالديم. سن ده بويويوب ايگيد اولدين، ايندي ووروشما ميدانينا گئديرسن. آتاني دا، مني ده سن عوض ائديرسن. چاليش كي، دشمن سني آرخادان وورماسين، سينه دن آلديغين سنه اؤلوم يوخدور، آنانين صاف قانينا خنجر باتماز.
آنانين خير دعاسيني ائشيدندن گردمان جنگاورلري قيلينجلاريني قينيندان چيخاروب هاوادا اويناتديلار.
– ساغ اولسون آناميز!- دئديلر.
سونرا جوانشيرين سسي ائشيديلدي:
– ايگيدلريم!- دئدي،- آتام مني جوانسان سوزي ايله يولا سالير، آنامين خير دعاسي ايسه، قوللاريما قووت، گوزلريمه ايشيق وئرير. آنام بيزي امتحانه چكير. منيمده شرطيم وار هر ساعتده يئددي قاصد محاربه ميدانيندان آناما خبر گتيرسين. باخ، بورادا، گردمان سارايينين قارشيسيندا ايكي جرگه دليقانلي دوزولسون، بو جرگه نين بيرينده يئددي اوغلان، الينده قيلينج- خنجر، او بيرينده ايسه، يئددي قيز، الينده گول- چيچك، دايانسين. مغلوب اولوب قاييتسام، قوي او يئددي جنگاورين هره سي منه ساغالماز بير يارا وورسون، غالبيته گئري دونسه م، يئددي قيز اوستيمه گول- چيچك سه پسين…
واراز بو شرطه راضي اولدو.
– اوغلوم،- دئدي،- دشمنين قارا ديرناقلي آتلاري كورون مقدس سولاريندان بير داملا بيله ايچرسه اونوتما كي او قيلينج يارالاريني سنه يئددي ايگيد يوخ، بوتون گردمان اؤلكه سي  ووراجاقدير. اوستون گلسه ن، اوستينه او گوللري، چيچكلري بوتون گردمان سه په جك.
جوانشير قوجا آتاسينين بو سوزلريندن داهادا روحلاندي.
– اوغوريميز خوش اولارسا، يئنه ده بورادا گوروشه ريك، آتا،- دئدي.
اونين آغ ديرناقلي كهلن آتين گتيرديلر. جوانشير آتا- آناسينين اليندن اؤپوب، جلد آتا سيچرادي.
كهلن آت شاهه قالخدي.
گردمان جنگاورلري اوني بو حالدا گوره ركن، دونيالر قدر سئوينديلر. جوانشير مهربان آتاسي وارازه به نزه ييردي.
حركت شيپورلادي. گورلادي داغلار، دره لر تيتره دي ، جوان سركرده نين قوشوني حركته گلنده، واراز گوزلرينده كي سئوينج ياشلاريني سيلدي.
– الله سنه يار اولسون، اوغلوم! دئدي.
بير هفته كئچدي. جوانشيرين قاصدي گلمه دي. قوجا وارازين صبري توكندي.
– كيم بيلير، بلكه ده بوتون قوشون اسير دوشموشدور؟
آنا اوره گي بو آغير حكمه دوزمه دي، جواهر خاتون دئي:
– صبر ائت واراز! سن قوجالديغجا، حكمدار اولديغيني اونودورسان…
بو آندا سارايين ياخينليغيندا يئل قانادلي بير سوار گوروندي، جواهر خاتون اوني هامودان اول گوردي.
– او، جوانشيرين ائلچيسيدير،- دئدي.
هامو درين بير هيجان و انتظارلا آتلي گلن سمته باخدي، قاصد گلوب آتدان دوشدي و حكمدارلا جواهرخاتون قارشيسينداتعظيم ائتدي:
– مرد سركرده ميزين ايلك قاصدييم،- دئدي،- دشمن كورچايينين بري تاييندا ايدي، اوستيميزه اوجسوز- بوجاقسيز نيزه لر دنيزي آخوب گليردي. سركرده جوانشير گوزله دي، دشمني ياخينا بوراخدي، ايلك حمله ده دشمندن ايكي يوز و بيزدن ايسه اوچ يوز ايگيدين قاني كورچايينين سولاريني قيرميزي رنگله بويادي، ووروشما گئت- گئده داها دا قيزيشير. دشمن بيزدن اون قات گوجلودور، خزر سركرده سينين قارا ديرناقلي آتي انسان  قانينا حريصدير.
وارازين قاشلاري چاتيلدي، دوداقلارينا خفيف بير تيتره ييش سيزيلدي.
– گئت اوغلوم،- دئدي،- بو آجي خبري ائشيده ن آنالارين اوره گي قانا دونمه سين!…
قاصد يئنه تعظيم ائتدي.
– بويوك حكمدار،- دئدي،- ايكينجي قاصدده اينديجه گلر.
گتيريلن خبردن كدرلنميش جواهر خاتون، حمدارين اطرافينه توپلاشميش اوغلانلارا، قيزلارا اوزوني دوتدي:
– جوانشير،- دئدي،- بيرينجي شرطه عمل ائدوب قاصد يوللادي، گردمان ايگيدلري، سيزده اونون ايكينجي شرطينه عمل ائدين!
بويوك آنانين مقدس حكمينه عمل اولوندي، گنجلر ايكي جرگه دوزولديلر. بير ياندا قيلينجلار پاريلدادي، بير ياندا ايسه، گوللر- چيچكلر عطر ساچدي.
چوخ كئچمه ميش جوانشيرين ايكينجي قاصدي اؤزيني يئتيردي.
– بويوك حكمدار!- دئدي،- بير گردمان جنگاوري دشمن سركرده سينين قارشيسينا چيخدي، آتين قانتارغاسيندان توتوب ساخلاماق ايسته دي، كافر دشمن قيلينجلا جنگاورين قوليني كسوب آتدي، جوانشير نعره چكدي:(( اي، قورخ كي سن، باشيني ده ايتيرمييه سن!))- قانلي ووروش گئت- گئده دونياني بورويه ن مدهش بير طوفانا بنزه يير. دشمن بيزدن اون قات گوجلودور…
وارازين قاني باشينا ووردي. اونين گوزلرينده دونيا قارالدي، او تيتره يه ن اليني قيلينجا آتدي.
– اوخ،- دئدي- جوانشير، جوانشير… من اوتوز ايلده بئله آجي خبر ائشيتمه ميشديم.
ايكينجي قاصد اونا تسلي وئرمه ك ايسته دي.
– بويوك حكمدار صبر ائدين.
– جوانشير مغلوب اولارسا، اؤزوم قيلينجا ساريلاجاغام،- دييه قوجا واراز يارالي بير آسلان كيمي نعره چكوب يئري- گويي تيتره تدي، بو آندا اوچينجي قاصد آتيندان دوشه رك يارالي حالدا سلديره يه- سلديره يه گلدي، گوجله اوزيني دوغرولداراق، قيلينجينا داياندي، تعظيم ائتدي.
– بويوك حكمدار،- دئدي،- جوانشير دشمن سركرده سيله قاباقلاشدي. او، قارا ديرناقلي آتيني عزيز اوغلونيزين اوستينه سكيرتدي. اگري قيلينجيني دوز اونين باشينا انديردي. جوانشيرين آتي بيردن كناره سيچرادي وبيردن دائره ووراراق اؤزيني دشمن سركرده سينين اوستينه آتدي. بيرده ن نه گورسه ك ياخشيدير؟ بدندن آيريلميش بير باش هاوادا فيرلانير…
قوجا وارازين اوره گينده اوغول محبتي جوشدي.
– او كيمين باشي ايدي؟- دييه صبرسيزليكله خبر آلدي.
بو سوألي سانكي هامو بيردن تكرار ائتدي.
– او كيمين باشي ايدي؟
قاصد نفسيني دردي. اونين قانلي دوداقلارينا خفيف بير تبسم اوينادي.
– بويوك سركرده ميز جوانشيرين اودلي قيلينجي وحشي خزرين كله سيني قارا ديرناقلي آتيندان اون آدديم كنارا آتدي. سونرا جوانشير بير اووج سواري جنگاوريميزله مئشه طرفدن دشمنين آرخاسينا هجوم چكدي، قان سو يئرينه آخوب ياشيل دوزلري باسدي. گردمان ايگيدلري دوزلري حلقه ايچريسينه آلوب دشمني گئري قاچماغا قويماديلار. ايندي اونلار ايلديريم مثالي قيلينجلارلا دشمن عسكرلريني بيچيب توكورلر.
بويوك آنانين سئوينجي يئره- گويه سيغيشميردي، چتين سيناقدان چيخميش اوغلونين يارالي قاصدينه باخاراق يئنه امر ائتدي:
– قيزلار- دئدي- بو شاد خبرلي ائلچينين يارالاريني باغلايين، اونين سينه سي دشمن قيلينجينا قالخان اولموشدور.
قاصدين گوزلري سوزولدي.
– يوخ بويوك آنا!- دئدي- لازيم دئييل. من بير دقيقه دن سونرا ابديته قووشاجاغام، اوف… سو…
آلا گوزلي گردمان دلبري بوز كيمي سويوق چشمه دن سو گتيروب يارالي جنگاوره وئردي او ايچدي و سوزونه دوام ائتدي.
– ايندي منيم سون سوزيمي دينله يين- دئدي- سركرده جوانشيره مندن سلام يئتيرين … دئيين كي…
بو آندا ماوي گويلرده اوزون بير دورنا قاطاري گوروندي، جنگاور اونلارين قافقيلتيسيني ائشيتدي، سون قووتيني توپلاياراق اوزوني اونلارا ساري توتدي:
– گويده اوچان ايپك قانادلي دورنالار! من داغلار قوينوندا كي طالستان كنديندنم، بوردان بير باش بيزيم شنليگه اوچون! انتظارلي آنالارا، مهربان باجيلارا، آل ياناقلي قيزلارا سويله يين كي، من اونلارين يوليندا ابديته قووشديم. منه هئچ بير زمان اؤلوم يوخدور!
او دوغرودان ابديته قووشدي، دورنا قاطاري اوزاقلاشدي داغلار قوينونداكي طاليستانا اونون سلاميني آپاردي…
يئنه شيپور سسلري گورلادي، ايندي جوانشير اؤزي گردمان ايگيدلري ايله برابر قاييديردي.
وارازين آلاو كيمي يانان گوزلرينده اوغلونين غلبه سيندن بير افاده وارايدي. او، جوانشير هله آت بئلينده ايكن، سوروشدي:
سويله، اوغلوم، سويله منيم كورپه پلنگيم، دشمن آتلاري كور چاييندان سو ايچه بيلديمي؟
جوانشيرين كهلن آتي شاهه قالخدي، بويوك بير قيلينجلار دنيزي گونشين آل شفقلريني عكس ائديردي، هامو اود كيمي پاريلدايان قيلينجلا حكمدارا جواب وئردي، جوانشير ديلله ندي.
– آتا:- دئدي- قارا ديرناقلي كافر آتلاري آنا وطنين مقدس  كور چايلاريندان ايچه بيلمه دي، لاكن دشمنلر اؤزلري بو سولاردان دويونجا ايچديلر.
سونرا وارازين سسي اوجالدي:
– گردمانا هئچ بير وقت اؤلوم يوخدور… اولادلاريم واراز اؤلسه ده، جوانشير ياشايير…- دئدي.
آلا گوزلي قارا تئللي شمشاد بويلو دلبر قيزلار، جوانشيري چيچك دنيزينده اوزدورديلر، اما يئنه اونون اودلي قيلينجي پاريلداييردي…
تاريخ ميلادينين يئددينجي عصرينده پارلاميش بو قيلينج اودلار يوردينين شهرتيني بوتون دنيايه تانيتدي.

یازان:  حسين مهدي

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: