خوش گونلر ناغیلی – جلال آل احمد


خوش گونلر

ايلك دفعه اونو بابلسر پلاژيندا گؤره نده ، ندنسه دقتيمي اؤزونه ساري چكمه دي . آخي بيرده بويئره تانيش اولماديغيم و تزه گلديگيم اوچون ، اطرافيمي احاطه ائده ن بير بئله شئيين ايچينده دقيق –  له شيب ، بير نئچه لحظه قيافه سيني سوزمه يه بئله امكان قالماميشدي . بونونلا بئله ايلك گونلرده گؤردويوم كيمي، يئنه بيلميرديم اونون دوداقلاري يانميش وقاراديشلري دوشوردويا يوخ .
نئچه گون بوندان قاباق بيريسي دنيزده بوغولموشدو . جاماعات ظاهرده اؤزلريني قورخماز و اوره كلي گؤسترمه يه چاليشسالاردا يئنه عصيانكار دنيزله باش –  باشا قويابيلمير ديلر .
تله سيك حالدا ساحيل قوملاري اوزريندن يوخارييا قالخان سيرتيق دالغالار ، يئني بير اوو دالينجا گزيردي . آمما الينه هئچ نه دوشمه ديگيني گؤروب ، اوتاناراق ، رحيمسيز ماوي رنگلي آناسي نيين قوينوندا گيزله نيردي .
گزمه يه چيخان وارلي بير عايله نين جيب ماشيني خاراب اولوب قالميشدي . چوخ چاليشديلار ، حتي دنيز قيراغيندا قارپيز ساتان اوشاقلاردا گليب ماشيني ايته له ديلر . آنجاق يئريندن ترپنمه دي ، آخيردا يولدان تر – تميز بير سواري يئتيشدي ، جيبي اونا باغلاييب قوملارين اوستونده ايره ليله ديكجه سانكي قيامت قوپوردو .
ائرمني عايله سيندن اولان قاري نين اوشاقلاري ، نوه لري ايله چيميرديلر ، يادا بير كونجوده اوتوروب جاوان يولداشلاري ايله دئييب گولوردولر . قاري ايسه آغ كؤلگه نديريگين آلتيندان آياقلاريني اوزاديب ، گونون حرارتي ايله ايستي لشن اطرافداكي قوملاري ، اؤزونه مخصوص بير ايفاده ايله گؤتوروب ، يوغون و اتلي قيچيلاري نين اوستونه تؤكوردو . قاري نين قيچلاري يوغون و اتلي اولدوغوندان ،تؤكولن قوملاري ساخلايا بيلمه ييب ، يئره آخيديردي . نهايت قاري آياقلاريني حرارتلي قوملارين ايچينده گيزلتمه يه موفق اولابيلمه دي ، او ، بير نئچه دقيق قوملارين ايده آل ايستيسي آلتدا قوجاليق سويوقلوغونو جانيندان چيخاريب ، قاپيسيني كسن اؤلومو بير آز اوطرفه قووا بيلمه دي .
بابلسرين اطرافيندا لنگرسالان « بارگاز » بير هفته اولاردي كي ، آرا – بير يكنسق گورولتوسونو دنيزين آغير دالغالارينا قاريشديرميشدي .
دنيز قيراغينا ايلك دفعه اولاراق ايكي گوندن – قاباق گلميشديم .
هاوا ساكت ، بابلسر پلاژي ايسه ازدحاملا دولموشدو . اوتورماغا يئر يوخ ايدي . هر يئره حصير سالينميشدي . امكانلاري اولسايدي كرايه چي لردن الوان كؤلگنديريكلر كرايه ائديب ، گونون آلتيندا اوزانارديلار و يا دنيزين قيراغيندا ناراحات اوشاقلار كيمي اؤزلريني اويان – بويانا چيرپيپ پالچيغا باتارديلار .
يقين اؤزلري ايله ايپك چادير گتيره نلرين شكيل چكن دوربين لري ده واردير كي ، تولالاريني قولتوقلارينا ووروب ، اوزمك پالتارلاريني سهمانلي پارلاق صدفلره دايانديقلاري حالدا شكيل چكسينلر . باشقالاري دا اوطرفده ناراحات حالدا دوروب قاش – قاباقلاريني ساللاياراق دقيقه لرله رنگي گئتميش كؤهنه دوربينين قارشيسيندا دايانيب دينمه دن باخيرديلار ، بونونلادا دنيز سفرينده كي ، آجي – شيرين خاطيره لريني دوربينين قارا بوغازينا تؤكوردولر.
منيم دقتيمي هرشئيدن آربيق اؤزونه جلب ائدن صحنه ، اونون شكيل چكن ، سه پايه سي ،بيرده دؤوره سينه دوزولن مختلف شكيل لري ايدي . شكيل لرين چوخونو ، بودلارينا كيمي سويا گيريب ، شكيل چكن آداملار تشكيل ائديردي .
باشيني سويا باتيريب ، حركتلري ايله خوش گئييملي تهران خانيملاريني گولدوره ن گنج بير اداره ايشچيسي سئويردي تئز دنيزدن چيخيب قيراقدا بير شكيل چكسين .
اونا گؤره ده ال – اياق ائديب پالتاريني گئيدي . حصير بؤركونو يانكي صورتده باشينا قوياراق باليق قولاغي ايله اؤرتولموش ياش قوملارين اوستونده دايانيب ، دوربين يئربه يئر اولونجاق كراواتيني دوزه لتمه يه مشغول اولدو . بو حالدا اؤزونه جرآت وئرميش اوتانماز بير دالغا ايره لي له ييب اونو دابانينا قده ر ايسلاتدي . اونا گؤرده ده گنج ، آغزينا گلن ياماني ، شكيل چكنه ياغديردي . اونون بو داورانيشي هئچ واخت منيم يايمدان چيخماز . بو ، بلكه ده بابلسر پلاژيندا شكيل چكمكله مشغول اولان دوداقلاري چاتداميش عكاسا قارشي دويدوغوم محبتدن ايره لي گليردي .
اوگون پلاژدا قالماديم ، كيچيك هوله مي چينيمه ساليب ، اوزاق گوشه لري گزمك مقصدي ايله يولا دوشدوم . ايكيندي اولانا قده ر اوشاقلار ساياغي باليق قولاغي و دنيزه آتيلميش خاويارلارلا اويناييرديم ، بعضاً‌ده خاطيريمده اولان شعرلري ترنوم ائديرديم .
ايكي گوندن سونرا يئنه پلاژا قاييتديم . ساحيلده قاباقكي كيمي آدام يوخ ايدي . دنيز ايسه يالقييز گؤرونوردو . منظره لري عادي و چكيملي دئييلدي . باجارا بيلسه يديم ، بوتون اطرافي گزيب ، دنيزله سمانين بيرلشديگي يئرلري اوزوب ، اولابيلسين كي ، يئني شئيلر تاپا بيلرديم . بلكه ده بابل چايلاري نين قايناقلانديغي يئردن چيخيب ، اوودالينجا گزه ن باليقجي قوشلار كيمي ذيروه يه قالخيب ، دنيزين ان درين ليينه جومارديم . چونكي قيراقليقدا داياز سولارا باتير دنيزين محكم ليگيني دويسام دا ، منه لذت وئرمه يه جكدير.
يئني شئيلرين آردينجايام . يول اوزونو گؤزه دين چمنلرين ، مئشه لرين غير عادي اؤته يي گؤزه لليك لري اؤز طراوتيني منيم خاطيريمه سالميشدي . اونا گؤره مندن يئني گؤروش طلب ائديردي . آمما دنيز قيراغيندا ، سولاري ساعاتلارلا قوللاريمين آراسيندا ساخلاييب هيجانلا كؤكسومو اؤتوروردوم ، او عظمت و اعتبار سيزليغين ايچينده اوزمك ، منيم اوچون عادي بير شئيه دؤنموشدو .
سويو سئير  ائديب ، قيراقدا اوزانديم . سونرا بؤيروم اوسته دوشوب ايستي قوملاري باشيمين آلتينا ييغديم .
ايشسيزليكدن ، كيچيك دولچالارلا دنيزدن سو آپارماقلا مشغول اولان عكاسدان گؤزومو چكه بيلميرديم . جانيمي رحمسيز و قيزغين گونشه تاپشيريب ، ياسديق عوضينه باشيمين آلتينا ييقديغيم قوملارين ايچينده ن گلن يئر قوردلاري نين سسيني ائشيتمه يه جان آتيرديم ، بير مدت بو حالدا دوشوب قالديم . بو لحظه منه ائله گليردي كي ، دنيزين ماوي رنگ جيغيري اوفوقلرين هر طرفينه ياييليبدير . بو منظره ني سئير ائده ره كن گؤزومون قارشيسيندا شيطانجاسينا سودان چيخيب ، سويا باتان باليقلارين حركتلري ايچينده ن ساحيلده شكيل گؤتورمكله مشغول اولان عكاسين قيافه سيندن بير شئيلر اوخويورام . اونون يانميش دوداقلاري بيردن – بيره دقت مركزيمده دوردو . آغاحدان دوزه لميش كيچيك دخمه ده بير كيشي نين آياقلارينا سو تؤكوب قوملاريني تميزله ين عكاسين اونونلا دانيشديغي سؤزلريني ائشيتديم . او عكاسدان سوروشور :
–   آغزين نئيه بئله دير ؟ اولمايا آغزينا گوگورد جوهري آليبسان ؟ باشيمي ترپتديكده ، اونلار مني گؤردولر و منيم بو حركتيم عكاسي جاواب وئرمكدن خلاص ائتدي . عكاس ايشيني قورتاريب گئتدي . اونون چهره سيندن ، سوموكلريندن ، گؤزلري نين چوخورا دوشمه سيندن ،‌ آلين قيرشيلاريندان آيري و غيرعادي بيرشئي تاپماق اولمازدي . آمما اونون دريسي سويولموش دوداقلاري و چؤروموش ديشلري داها آرتيق مني دهشتلنديريردي . هامي چيخيب گئتميشدي . مندن ،‌كرايه چي ، بابللي قهوه چي دن و بيرده اوطرقده گرامافونو كؤكله ييب ،‌قوملارين اوستونده رقص ائده ن خوش گذران بيل عايله دن باشقا هئچ كس قالماميشدي . منيم فيكريم يالنيز اونون يانيندا ايدي ،‌اونا گؤره آستا – آستا ايره لي له ييب ،‌ جسارتله اونون يانينا گئتديم . قهوه شاكيردي اونو گؤرمه سه يدي ،‌ دولچادا سو آپاريب ، چيميب ، سودان چيخان آداملارين آياقلارينا سوتؤكوب پول آلاردي . عكاس شكيل چكديرمك ايسته ين آداملارين اوستو- باشيني سهمانلاييب ، ياخشي منظره اولسون دئيه دنيزين ان گؤزه ل بير بئريني سئچيب شكيل چكردي . او،‌بويشدن علاوه ناشي واللرينه يئنيجه دوربين آلان خانيم لارين دوربين لريني تنظيم ائده ردي . داليني دنيزه چئويريب سونسوز ساحيللري سئير ائده ره ك ،‌ پاپروزونو سوموراراق توتسوسونو هاوايا بوراخاردي . من هاوادا رقصه گلن پاپروس توستوسونو سئير ائديب بير مدت اونو ايزله ديم . آمما او هاميدان اوز چئويردي . ايشي اولاندا اونون قيافه سينه چوخ دالميردي ، بلكه اؤته ري بير نظردن سونرا ايسينه باشلاييردي . سانكي بو طرفده تانيشي يوخ ايدي ، معلوم اولودوغو كيمي ايلك باخيشدا آختارديغي آدامي تانيييردي .
كرايه چيلر مسافرلرله قيزغين دانيشيرديلار , بللي قاييقچي لر مسافرلريني بابلسر كؤرپوسونون آياغينا چاتديرانا كيمي ،‌اونلارا دنيزده باش وئره ن حادثه لره قارشي سينه گريب ايگيدليك گؤسترمكلريندن ،‌ ياشهردارا گونده ليك وئره جكلري پوللارين آلتيندان چيخمالاريندان دانيشيرديلار . عكاسي هئچ كيمسه تانيميردي ،‌اونا گؤره ده اونونلا دانيشان اولموردو . اونون باره سينده منه آز – چوخ معلومات وئره ن قهوه چي شاگريردي اولدو . بئله ليكله ده من اونون دوداقلاري نين يانيب ،‌سويولماسيني و ديشلري نين تؤكولمه سيني اؤيره نديم ،‌دوشوندويوم كيمي او ، تك ايدي . معلوم اولدوغو كيمي باشقا هئچ نه يي و هئج كيمي يوخ ايدي ايشي اولماياندا اونونلا دئييب دانيشسين .
قهوه چي شاگيردي نين دئديگينه گوره او « پهلوي » بندريندن بورايا تزه گليبدير . و دؤرد گوندور كي ،‌شكيل چكمكله مشغولدور. باشقا بيريسي دئييردي كي : اونو مأمورلار بوردا دا گؤزدن قويمورلار.
دنيز قيراغي خلوتلمنيشدي . دنيزين اورتا سيندا بير قاييقچي تصنيف اوخويوردو . آنجاق دنيزين كوشولتولو دالغارينا قاريشيب ايتيردي و نه دئديگي ايسه آنلاشيلميردي .
گونشين حرارتي گئت – گئده چوخاليردي . قوملار ائله قيزيشميشدي كي ،‌آياق باسماقدا بئله اولموردو . خوش دريلي و ساري بير اينك قوملارين آراسيندان قارپيز قابيقلاريني آراييب ،‌شاپپيلدادا – شاپپيلدادا يئييردي . ايندي باليق يئين قوشلاردان و شيطان باليقلاردان سس – سوراغ يوخ ايدي . شهره قايتماغا حؤصله م يوخ ايدي . آياغا دوروب ،‌ايستي قوملاردان ياخا قورتارماق اوچون اؤزومو شكيل چكن عكاسا چاتديرماغا تله سديم . اونا ساري گئديب ،‌دورينين قاباغيندا دوروب  تاماشا ائتديم ، آياغيمين گؤينه مه ييني ساحيل قوملاري نين شئهلري تماميله آرادان آپارميشدي .
نه غم ، نه ده پاخيلليق . يالنيز سرين مئه و دنيز شوقي وارايدي .  اطرافدان خبرسيز تر- تميز سولار سينه سيني گونشين حرارتي اشعه سينه قارشي آچاراق خبر وئريردي . لاكين بير بئله شؤوق و تميز نسيم قاتيشان بير گوگرد جوهريندن دوداقلاري سويولموش ساعاتلار چورموش ديش لري بير –بيرينه كئييشميش قوخوسو گليردي .
خؤره ك يئمه يه مئيليم چكميردي . فيكريم شكيل چكه نين يانينداايدي . ائله بيل ايشي قورتاريب ، منيم شكيل لريمي ايسه قوروتماق اوچون بؤيوك بير يايليغين قاتينا بوكموشدو . قاباغا گئتديم . پيس شكيل لر دئييلدي . آمما فيكريم اونلاردا يوخ ،‌بلكه شكيل چكمه نين اؤ‌زونون يانينداايدي . گؤزلري نين درينليگيندن اوخودوم كي ،‌اؤزايسته ديييني تاپميشدير .
بير سؤز دئمه ديم . اومنه باخيب پاپروسون كؤتويونويئره آتدي ، آياغا قالخاراق :
–   يقين شكيل چكمك ايسته ييرسيز؟ – دئدي .
–   بلي
ندنسه قيافه سينده دگيشيك ليك باش وئرمه دي . سانكي اونون قارشيسيندا دوران يوخ ايدي . تئز – توو اايشينه باشلادي . معلوم اولدوغو كيمي قيافه سينده دهشت ،‌قورخو،‌قايغي ،‌عذاب و ناراحاتليق بئله يوخ ايدي . منيم وار- گل ائتمه ييم اونون نظرينده عيني لشميشدي . دوبينين سه پايه سيني اوطرف – بوطرفه چكيب تنظيم ائتديكدن سونرا شاسيني ائشيگه چكيب دوربينين جواريندان آسيلان جعبه‌نين ايچيندن كاغيذ آختارماغا باشلادي.
سونرا شاسيني يئرينه قويوب، دوربينين قاپاغيني گؤتوروب، نؤمره‌سيني تنظم ائتدي. و شكليني گؤتوردو. بير تهر اونونلا صحبت ائتمه‌يه يول آختاريرديم. قالميشديم كي، نئجه و هارادان باشلاييم.
شكيل‌لر حاضير اولانا كيمي، بير شئي يئمك مقصدي ايله بوفه‌يه ساري يولا دوشدوم.
بوفه‌نين وار يوخو حصير كؤلگنديريك، بير نئچه چير كلي صندلي، اوجا و اوزون بير ميز و اونون اوستونده نئچه پامادور بوشقابي، نئچه دنه آغ چؤره‌ك، و قفسه‌يه دوزولموش مختلف ايچگي‌لردن عبارت ايدي.
او خوشبخت عايله‌نين اويناماغي هله‌ده داوام ائديردي. گرامافون صفحه‌سي قورتاريب، خيشيلداييردي. بير عاغيللي آرواد، ايكي قيز، بلوغ حدينه چاتميش بير اوغلان و بير نئچه باشقا يئني يئتمه بيرليكده رقص ائديرديلر. صفحه‌ني چئويرمه‌يه فيكر وئره‌ن يوخ ايدي. بوفه‌نين قوللوقچوسو چارپايا اوستونده اوتوروب، آغزي‌نين سويونو اوتوردو.
دئديم كي، ناهاريمي كؤلگه بير گوشه‌ده ميزين اوستونه دوشه‌سين، چؤره‌يي يئيه- يئيه‌ده دنيز سئيريندن دويموردوم.
سولارين اوستوندن اسن سرين نسيمده نه شئه قوخوسو واريدي،
آيدين گؤرونوردو كي، اوره‌يينده كي غم- غصه سو اولوب، گؤزلريندن آخاجاقدير. او، صحبتي آچماغا چاليشيردي. اونو ايلك دفعه گؤروب دهشت ائتديم. يانميش دوداقلار. بئله دئييلدي. سانكي او دفعه عاغليمي بير يئره توپلايا بيلمه ميشديم. فرصتدن استفاده ائده‌رك دئديم:
پيس شكيل دئييللر. ياخشي، ياديگارليق دير، ياخشي كاغيذي وار، هاردان آليرسيز؟
پهلوي ده اولاندا ايكي- اوچ بسته آلميشام. بوردا كي شكيل چكديره‌ن يوخدور.
دئديكده من:
قهوه‌چي شاگردي دئييردي پهلوي ده ايدينيز، يقين اورادا دا چكمك‌له مشغول ايدينيز. دوزو او كيشي‌نين جاوابيني نه اوچون رد ائتدين؟
هانسي كيشي؟
اوكي، سيزه دئدي آغزينيزا نه اوچون گوگورد جوهري آليبسيز.
دوز دئييردي؟
يوخ، نه بيليرم. آدام بيلمير كيم ايله طرف دير. جاماعات همين قايغي كئشليگي اؤيرنيبلر. آدام سحردن آخشاماجان دوروب جاماعاتا جاواب وئرسه، اوندا بير ايش قاباغا گئتمز. نئچه گوندور گؤرورم چوخو مندن قاچير. دوغروسو آغيز- بورنوم چوخ عيبه‌جردير؟…
صحبتي آچماغا چوخ‌تله‌سيردي. اوره‌يي نين دردي دئشليمكده‌ايدي.
كيچيك جولدمو چيگنيمه ساليب، اليندن توتوب اوزوموز دنيزه ساري اوتوردوق. گؤزلريمي اطرافدا گزديره‌رك.
دئديم:
يوخ چوخ‌دا عيبه‌جر دئييل، يالنيز سحردن ايندييه‌جن منيم حاليمي قاتيبدير. بلكه ائله گومان ائديرسيز كي، من ده آرشديريجييام، نه‌يي، ها: آمما هره بير جوره فيكيرله شيب دئيير: يقين اؤزو و يا آيريسي بونا زهرلي بير شئي ايچيرديب. ايسته‌ييرم بير سؤز دئييم، چونكي اوره‌ييم سنه يانير.
بونونلا بئله صميمي لشديك. اطرافدا كيمسه گؤرونموردو. ايكيندي چاغيناجان جاماعاتين ده‌تيره آخيب، گليب، هاي- كوي سالماغينا هله بير نئچه ساعات قاليردي. ايلك باخيشدا كيم اوادوغونو اؤيره‌نديم. او، اؤتن نئچه آيدا باشينا گلنلري نقل ائتمه‌يه باشلادي.
او، سؤزه باشلاياندا دنيز ساكت‌لشميشدي. اوره‌ييندن قوپان آغير غملر ناهار زاماني‌نين آيدين سماسينا ياييلاراق اسمكده اولان كولكلرين قارشيسيني آليب، دنيزه سكوت درسي وئريردي. او، پاپروسونو آليشديريب، اطرافا گؤز گزديره‌ره‌ك سؤزه باشلادي:
نهايت بو قرارا گلديك‌كي، اؤزوموزو بير طرف‌ليك ائده‌ك، آرتيق نه اولا بيلردي؟
دونيادا نه قويوب، نه آختاريرام؟ آرواديم هله‌ده آللاهدان قورخور. هر حالدا من راضي سالديم. منيمله آرواديم آراسيندا هئچ بير گيزلي شئي اولمازدي. او هر شئيي بيليردي. او بيليردي كي، من توكان آلا بيلمه‌يه‌جه‌يم. او، بيرده اوغلونو گؤره بيلمه‌يه‌جه‌يينه فيكيرلشيردي. خاطيريندن چيخارمالي ايدي. او، منيم مشتريلريمين هاميسيني تانييردي. اوغلونون غصه‌سيندن يورولموشدو. او منيم قراريمي، دويان زامان بير آز هيجاني‌نين سسيني بيليرديم. اؤزوموزو راحات ائده بيلمه‌ديك. افسوس، ايلك گونلر اودا چكيلميش توكانين فيكريندن ياخا قورتارا بيلمه‌ديم.
اولمادي كي اولمادي. گؤردويونوز كيمي هله ده ديري‌يم. هله ده بو عيبه جر دوداقلاريملا جاماعات آراسيندا ايت كيمي اويان- بويانا آتيليرام، آخي نه زامانا جان دريدن- قابيقدان چيخاجاغام. اونون دا بير حدي‌وار.
منيم ايندي 45 ياشيم وار . ايگيرمي ايلي هئچ ،‌قالير 25 ايلي . 20 ايلي انتظار و منه قالان بئش ايل اولموشدور . بئش ايل نه دير كي ،‌اودا بئله قورتاردي . بيلسه يديم ايشيمين سرانجامي بئله اولاجاقميش هئچ بئريمدن ترپنمزديم . اوچ ايل ائويمي داليما آتاراق كندلري گزيب ، شهرلره گئتديم . ائله شكيل چكديم آخيردا هئچ اولدو . ياخشي هاميسي ياندي . ياخشي اولدو اؤزومه بير شئي قالمادي . دوغرسوياخشي ياديگارليق اولابيلردي ، آمما هاراسي ياخشي ايدي .
يالنيز تأثير ائديجي ايدي  . آخي بيلميرسيز آدامي نئجه تأثيرلنديريردي . داها نه فايداسي . بوتون شكيل لري وئرديم گونده ليگه چئويرديلر . اودا نئجه ! منيم بوشكيل چكن دوربينيم اؤزومدن قالان دئييل ،‌ايت جاني وار ،‌هئچ واخت مندمندن ال چكنه دي . ياشاييشا بيربئله اود ياغسادا ،‌اونون حالينا فرق ائتمه دي ايت جاني وار.  منيم ده حانيم ايت جاني دير . آنجاق او مندن بتردير . بيلمه ديم اونو   نئجه آرادان چيخادتديم ،‌ائله بيل قاباقدان توكانين اودلانماسيني بيليرديم . اونا گؤره دوربيني گؤتوروب گئتديم . دوز بير هفته گيزلنديم . هر نه ييم وارايدي ، قويدوم قالدي ،‌ائويييه سيندن بير چانتا آليب دوربيني اوندا يئرلشديرديم . ايندي او زاماندان چوخ كئچيراوگئجه كي ،‌اؤزوموزو راحات ائتمك ايسته ييرديك ،‌لاپ ايندي ده گؤزلريمين اؤنونده جانلانير . گئجه لر همين توكاندا ياتيب اورادا ياشاييرديق .
بير سوبلمه ني ايكيميز يئييب ،‌راحات ياتيرديق يوخلاماغا چوخ بيز يوخلاماق يوخ اؤلومو گؤزله ييرديك ،‌ايسته ييردبك كي ،‌بو غولاق .
بيز يوخوسو گلمه ين و تئز – تئز يولداشيندان « اوياقسان يا يوخ » دئيه سوروشان آداملار كيمي ،  تئز – تئز بير – بيريميزدن سوروشوردوق .
حيات يولداشيمي نه يوخوآپاريردي ،‌ نه ده اؤلوردو دوربينين قاراجعبه سي اوندا ! بوساياق قارشيميزدا دوروردو . دوزقار و ولچولار كيمي دوروب بيزه باخيردي . اليندن جانا گلميشديك . اوغلومون غصه سي ده بير طرفدن منيم اوچون فرق ائتمه دي ،‌آمم حيات يولداشيمين اوره يي لاپ يئريندن اويناييردي . آز قالا اؤزونو اؤلدوروردو . اوچ آي تامام آغلادي .
اوقده ر زاريلداييردي ،‌آخيردا مني ده حؤصله  دن ساليردي . اونون غصه سي بيرطرفدن ،‌مأموروندا عذابي باشقا طرفدن بيزي الدن قويموردو ،‌ياواش – ياواش تانيشليق قاتيب ،‌بعضي واختلار توكانا گليب چاي ايچيب ،‌پاپروس تانيشليق قاتيب ،‌بعضي واختلار توكانا گليب چاي ايجيب ،‌پاپروس چكيرديك . اوره ييني منه آچيب ،‌سؤزونو قورتاراندان سونرا گئديردي . دانيشديغي سؤزلر باشينا دگسين . قيرخين دا اوستونه قويوب ،‌يالان – يالان دانيشيردي . ائله منيم ده ده مي يانديران همين خبرلراولدو . بيليرسيز او سؤزلر اوستونده گليب مندن تحقيقات آپارديلار؟  منه اولمايان سؤاللار وئرديلر.
لاپ جانيم بوغازيما ييغيشميشدي . هئچ حؤصله م قالماميشدي . آوارا چيليقلادا قويمورددولار. «‌پهلوي » بندريني تانيميرديم ،‌بيريسي ايله دوست اولماق ايسته ميرديم . قورخوردوم . منله دوست اولماغات كيمين حؤصله سي وارايدي ؟‌
آجانلار مني دؤرد گؤزلو ايزله ييرديلر ،‌اونا گؤره ده منه ياخين گلن يوخ ايدي . منيلمه سالاملاشماغا بير نفرده يوخ ايدي . بو وضعيت مني سارسيديردي . آرزو ائديرم ،‌بي دفعه ده اولسا بيرينه سالام وئريرم . آرزو !‌آمما هاردا ؟ ائله همين آجان –تئز –تئز قارشيما چيخيردي . مشتريلريم الدن يخميشدي … منيم يانيمدا شكيل چكديرمه يه كيمين جؤصله سي اولاردي . جاماعات هميشه دينج يئرلري سئوير. بود ده سي ائششك هر شئي گئديب دئييردي و بيزي چؤره كدن ساليردي . دؤزمكده اولموردو . بوندان سونرا بير آزدا بويازيق قارنيمين فيكرينده اولمالييام . اوغلومدان دا بير سوراق گتيره ن اولماييب . يقين بيليرم كي ،‌حياتيني ايتيريبدير. آمما آناسي بيلمير. بيرده نه فرق ائده جك ، اونو بيرده گؤره بيلمه يه جك . يالنيزياشاييشي منه حرام اولموشدو. بيرده هانسي ياشاييش ،‌ايتينده دولانيشيغي بيزدن ياخشي ايدي .
من آغاج دگميش ايت كيمي نه واختا جان « سالاملاشماق» گؤزله يه يديم ومني ايزله ين آجاندان باشقا كيم سوراغيمي توتاجاق ايدي ؟ من نه زامانا كيمي بير تيكه چؤره يين فيكرينده اولاجاغام . عادت ائتمه ميشديم اؤزوم اوچون توكان آليم . كندده اولان زامان هئچ كس بيريولدا اولسون قويماميشدي اليمي جيبيمه اوزاديم . نه خوش گونلر ايدي ،‌گؤره سن او گونلر يئني دن تكرار اولاجاقمي ؟ بلكه يوخودا گؤره بيلم يوخودا دا گؤره بيلمه يه جه يم . دئميرم اؤلوب راحات اولام . بوردا دا مندن ال چكميرلر . نئيله ميشم آخي ؟‌ كندليلرين شكليني بيريئرده نييه ساتيرديم ؟‌ همين ؟من مازندران ولايتيندن زنجانا كيمي گئديب شكيل چكميشم بوكي گناه دئييل ؟گناهيم وارسا نييه دوستاق ائتميرلر؟ اؤلوم ياخشي دير . اؤلمكده اولمور.

یازان:  جلال آل احمد

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: