آذربایجان حاقیندا تورکی شعرلر


آذربـایــــــجان

عزیـز آذربایــــــــــجان ای گوزل دیار،

آنامـین مــــهریــبان قوجــاقی سنسـن،

کونول طرلانینین اوچوپ قونـــدوغی،

اونون چوخ سودیگی بوداغی سنسن!

سنسن دوشوندوگوم سنسن آندیغیم،

مـــنیم بو دونــــــیادا آرخالاند یغــیم،

یـــــئتر آلیشدیغـــیم یــئتر یا ندیغــیم،

شعریمین قلبیمین سوراغی سنسن!

قوی آچسین کونلیمی سوزلریم منیم،

سندن نجات اومـــورگوزلریم مــــنیم،

هـــــله اگیلمه­ییب دیـــــزلریم مـــنیم،

چونکو او دیـزلرین دایاغی سـنسن!

دئسم ده وورغونام دیــوانه ســانما،

من کی اوز اوغلونام بیگانه ســانما،

بیر شمسیز آتشسیز پروانه ســانما،

یاندیغیم اودلارین اوجاغی ســنسن!

چوخ واخت اومود وئریر بوائللر منه،

گـــلیب قوشــولورلار چون ائـللر منه،

آچیر اوز ســــیرینی کونــــوللر مـــنه،

دییر یوردوموزون قوناقی ســـــنسن!

نه اولار کی کونلوم بــیر لاله اولـسا،

بـاهــارین الـــینده پــــیاله اولــــــسا،

آزادلـیق دونـــــیایا شــــلاله اولـــسا،

اونون قایـــنادیغی بولاغی ســـنسن!

ســــیـخسادا نه قــدر روزگار مــــنی،

یاندیریب یاخــسادا انــــتظار مـــــنی،

بوغـــــماز فـــــرتانالار دریالار منی،

چون آغیر گونومین مایاغی سنسن!

قوی بیلسین ای وطن هرآلچاق یاغی،

سولســون او کونلینین امید یارپاغی،

ســن بابک یوردوسان آذر توپراغی،

آصــلانلار اویلاغی یاتاغی ســـنسن!

بـــیلسینلر اگــیلمز او شـاه وقاریــن،

ئونــینده هیچ زامان غـضبکارلارین،

گوندوز گونـــشیسن بــــیزیم دیارین،

گئجه یانـــدیردیغی چراغی ســـنسن!

(شعر: بالاش آذر اوغلی)

آذربـایــــــجان

قــیزیل گونش گوی اوزونده گـولنده،

نغمه سینی قوشلار باغ- باغ بـولنده،

من گوز آچـــیب، بو دونـــــیایا گلنده،

بخت اولدوزوم بورادا یانان اولوبدور

ایلک بئشیگیم آذربایــجان اولــوبدور

تاپـپور- توپـپور آددیم آتیب، گـزمیشم،

گوله باتــیب، شـئهه باتــیب، گزمیشم،

الــلریمدن آنام تــوتوب، گــــــــزمیشم،

سئوینجیمیز جوشغون عمان اولوبدور

ایلک بئشیگیم آذربایــجان اولــــوبدور

یوللار آچیب قوجـاغینی، گل، دئییب،

ســنینله دیر اوبا دئـییب، ائل دئـییب،

اوره گـیمین سـوزلرینی دیـل دئـییب،

کونلوم سوزله دولو جهان اولوبدور

ایلک بئشیگیم آذربایــجان اولوبدور

بعضا یولوم یوخوش اولوب، قالــخمیشام،

هارای سالیب، شیمشک کیمی چاخمیشام،

نـــــغمه اولوب، ا وره کـــــــلره آخمیشام،

ائل ســـــئوگیسی منه بــــــیان اولـــوبدور

ایــلک بئشیگیم آذربایــجان اولــوبدور

سئوینجیمه گوز دولوسو گوله نیم،

نـیسگیلیمی، ا یــستگیمی بـیله نیم،

دار آیـــــــاقدا هارایـــــــما گله نیم،

هاواداریم هر بـیر زامان اولـوبدور

ایلک بئشیگیم آذربایجان اولوبدور

چاغــلاماقی بولاقــــلاردان آلــــمیشام،

بوی آتــماقی قوواقــلاردان آلـــمیشام،

عـــــظمتی بو داغــــلاردان آلـــمیشام،

هر داش – قـایا جانا درمان اولــوبدور

ایلک بــئشیگیم آذربایــجان اولـوبدور

بـختیمیزی قـیزیل گـونش اویاددی،

بیز حیاتی، حیات بـیزی اوجالتدی،

ائلیم اوبام ظـــفرلره بـوی آتــــدی،

دونیا بیلدی تزه دووران اولـوبدور

ایلک بئشیگیم آذربایجان اولوبدور

شـــفق ینه ناخیش ســــالیر یولـــلارا،

امک گولور، قــــوت گــــلیر قولــلارا،

بو ثـــروته، بـو جــــــلالا، بـــــو وارا،

طــــبیعت ده، دوزو، حئیران اولوبدور

ایلک بئشیگیم آذربایــجان اولــــوبدور

لایلالاریـــم قــــوت وئــریب جانیما،

لایلایـــــم چـون قربـان اولوم آناما،

بو آنـــــــالی بـو لایـــلالی دونـیاما،

دوغما تورپاق نه مهربان اولوبدور

ایلک بئشیگیم آذربایجان اولوبـدور

یواسی وار کورپه جــه بیر قوشون دا،

مــــعناسـی وار قــایانین دا، داشین دا،

نه یاخشی کی، کونلوم جوشوب، داشاندا،

نــــــغمه بــوردا یــــووالانان اولـوبدور

ایلک بـــــئشیگیم آذربایـجان اولـوبدور

شعیر: مدینه گولگون

آذربـایــــــجان

چوخ کئچمیشم بو داغلاردان،

دورنا گوزلی بولاقلاردان،

ائشیتمیشم اوزاقلاردان،

ساکت آخان آرازلاری،

سینامیشام دوستی یاری …

ائل بیلیر کی، سن منیمسن،

یوردوم یووام، مسکنیمسن،

آنام، دوغما وطنیمسن!

آیریلارمی کونول جاندان؟

آذربایجان، آذربایجان!

من بیر اوشاق، سن بیر آنا،

اودور کی، باغلییام سانا،

هانکی سمته، هانکی یانا،

هی اوچسامدا یووام سنسن،

ائلیم، گونوم، اوبام سنسن!

فقط سندن گن دوشنده،

آیریلیق مندن دوشنده،

ساچلاریما دن دوشنده،

بوغار آیلار، ایللر منی،

قیناماسین ائللر منی

داغلارینین باشی قاردیر،

آغ ئورپگین بولوتلاردیر،

بویوک بیر کئچمیشین واردیر،

بیلینمه ییر یاشین سنسین،

نه لر چکمیش باشین سنین.

دوشدون اوغورسوز دیللره،

نحس آیلارا، نحس ایللره،

نسیللردن نسیللره،

کچن بیر شهرتین واردیر

اوغلون قیزین بختیاردیر …

هی باخیرام بو دوزلره،

آلا گوزلی گوندوزلره،

قارا خاللی آغ اوزلره،

کونول ایستر شعر یازا

گنجله شیرم یازا- یازا …

بیر طرفین بحر خزر،

یاشیل باش سونالار گزر،

خیالیم دولانار گزر،

گاه موغانی، گاه ائلداری،

منزل اوزاق عومور یاری!

سیرا داغلار، گن دره لر،

اوره ک آچان منظره لر،

جیران قاچار، جویور مه لر،

نه چوخدور اولاغین سنین!

آرانین، یایلاغین سنین!

کئچ بو داغدان بو آراندان،

آستارادان، لنکراندان،

آفریقادان، هندوستاندان،

قوناق گلیر بیزه قوشلار،

ظلم الندن قورتولموشلار …

بو یرده لیمون ساری،

اکیر، سالیر بوداقلاری،

داغلارینین دوم آغ قاری،

یارانمیشدیر قارلی قیشدان،

بیر سنگردیر یارانیشدان،

لنکرانین گلی رنگ – رنگ،

یودوموزون قیزلاری تک،

دمله چایی، توک وئر گوره ک،

آنامین دیلبر گلینی!

یادلارا آچما الینی!

ساری سنبل بیزیم چوره ک،

پامبوغوموز چیچک-چیچک،

هر اوزومدن بیر شیره چک،

سحر- سحر آج قارینا،

قوت اولسون قوللارینا

مین قازاخدان کوهلن آتا،

یالمانینا یاتا- یاتا،

آت قان تره باتا- باتا،

گوی یایلاقلار بئلینه قالخ،

کپز داغدان گوی گوله باخ!

ای آزاد گون، آزاد اینسان،

دویونجا ایچ بو باهاردان!

بیزیم خاللی خالچالاردان

سر چینارلار کولگه سینده

آلقیش گونش اولکه سینه

کونلوم کچیر قاراباغدان،

گاه بو داغدان، گاه او داغدان،

آخشام اوستو قوی اوزاقدان،

ها والانسین خانین سسی،

قاراباغین شیکسته سی

گوزل وطن، معنان درین،

بشیگیسن گوزللرین!

عاشیق دییه ر سرین – سرین،

سن گونشین قوجاغیسان،

شعر، صنعت اوجاغیسان

ئولمز کونول، ئولمز اثر،

نظامیلر، فوضولیلر!

الین قلم، سینه ن دفتر،

ده گلسین هر نه یین واردیر،

دئیلن سوز یادیگاردیر

بیر دون بیزیم باکی یه باخ،

ساحیللری چراغ- چراغ،

بوروقلارین هایقیراراق،

نعره سالیر بوز چوللره،

ایشیقلانیر هر داغ، دره

نازلاندیقجا سرین کولک،

ساحیللره سینه گرک،

بیزیم باکی بیزیم اورک!

ایشیقدادیر قوت سوزی،

سحرین اولکر گوزی

گوزل وطن! اوگون کی، سن

آل بایراقلی بیر سحردن

ایلهام آلدین، یاراندیم من

گولور تورپاق، گولور اینسان،

قوجا شرقین قاپیسی سان!

دینله منی، گوزل وطن!

بیر سوز گلیر اوره گیمدن:

خلقیمیزین عشقیله سن

گوله جکسن هر بیر زامان،

آذربایجان، آذربایجان!

(شعر: صمد وورغون)

آذربـایــــــجان

ای اودلار وطنی، هر اویلاغیندا

قیر آتین، بوز آتین ایزلری واردیر،

بو شاه وقاریندا، بو نوراغیندا

او قوچ کوراوغلودان بیر یادیگاردیر،

بو قدیم قلعه لر، بو قارلی داغلار

اونون هیکلینی قوینوندا ساخلار،

بوردا قیلینج وورموش بابک، جوانشیر

قوروموش یادلاردان آنا یوردومی،

نه بیر باسغین ائدن، نه بیر جهانگیر

باتیرا بیلمه میش قانا یوردومی،

عومرونین گنج چاغی ایگیت ستارخان

فقط سندن ئوتری کئچدی جانیندان،

ایندی بویوتدیگین بو اصلانلارین

اصلا اونوتماییر ئوز اجدادینی،

ناموسلی، غیرتلی قهرمانلارین

قانیله قازاندی ئوز حیاتینی،

ستالین عصرینین مرد اوغوللاری

آچدی اللریله باغلی قوللاری،

سنینده باغیندا نو باهار کیمی

تازه غنچه له نیر گول آذربایجان،

بزه ن باشدان باشا لاله زار کیمی

سئوین آذربایجان، گول آذربایجان!

ائللر باخیب سنه ئوگونسین باری

آچیلسین آلینینین قیریشیقلاری،

بو دوری گورسیدی عاشق علی عسگر

منیم تک اونیندا قلبی جوشاردی،

گوتوروب سازینی هر آخشام – سحر

بو آزاد گونلره نغمه قوشاردی،

قالسیدی یازاردی بویوک نظامی

زنگین قلمیله بو خوش ایامی،

قوی اوجا داغلارین وئرسین باش – باشا

یارسین دومانلاری اورتادان باری،

بو گوزل حوسنینه ائتسین تاماشا

بولوتسوز گوگلرین آغ اولدوزلاری،

گورسونلر قیزیلدیر بو یئر، بو توپراق

جنت گوگده دگیل، یئرده دیر آنجاق!

بو باهار، بو شیرین میوه لی باغلار

بیزه بابالاردان بیر خاطراتد یر،

بو سرین چشمه لر، آینا بولاقلار

آذر اولادینا آب حیاتدیر،

بو ساری سونبوللو چوللر سنیندیر

یاشیل منظره لی گوللر سنیندیر،

شهرتین بوروموش بوتون عالمی

شرقین یاراشیغی، افتخاریسان،

اونون گوگلرینده آل گونش کیمی

شفقلر ایچینده یان آذربایجان،

سعادته دوغرو یئریدیکجه سن

خلقه ظفرلر دیله ییرم من،

(شعر: علی توده)

2 Cavab

  1. ایللردی کی آذربایجانیمدان ، آنا یوردومدان آیری توشموشم بو شعرلری اوخودوقجا روحوم تازه لندی . چوخ ساغ اول دوزلو اوغلان

  2. سالام دوزلو اوغلان
    اگر امکانی اولسا فیلم لری ین هاموسون بیر دی وی دیه ورون وساتماقا قویون
    چوخ تشکور ایدیرم

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: